काठमाडौँ । नेपाली चलचित्रका निर्माता, वितरक तथा हल सञ्चालक नरेन्द्र महर्जनले सञ्चालनमा ल्याएको कीर्तिपुर सिनेप्लेक्समा नयाँ अडिटोरियम थपिएको छ । ‘अडि–२’ नाम दिइएको उक्त हलको उद्घाटन बिहीबार चलचित्र विकास बोर्डका अध्यक्ष दिनेश डिसीले गरे ।
१०१ सिट क्षमताको ‘अडि–२’ मा बार्को प्रोजेक्टर, पल्सको ७.१ साउन्ड सिस्टम, लक्जरी सिट र थ्रीडी प्रविधि जडान गरिएको सञ्चालक महर्जनले जानकारी दिए । चलचित्र संघका अध्यक्ष समेत रहेका महर्जनले कीर्तिपुर सिनेप्लेक्सलाई पहिलेको पुरानो ‘कीर्तिपुर हल’ पुनःनिर्माण गरी आधुनिक स्वरूपमा सञ्चालनमा ल्याएका हुन् ।
उनका अनुसार दुई पर्दे हल सञ्चालन गर्ने योजना पहिले देखिनै भए पनि कोरोना लगायतका कारणले सुरुमा मात्र एक पर्दा सञ्चालनमा आएको थियो । दर्शकको चाप बढ्दै गएपछि सुविधालाई प्राथमिकता दिँदै दोस्रो पर्दा थपिएको हो ।
“हामीले पर्दा मात्र थपेका छैनौँ, हललाई अत्याधुनिक सुविधासहित पूर्ण रूपमा आधुनिक बनाएका छौँ,” महर्जनले भने, “अब दर्शकले आरामदायी वातावरणमा चलचित्रको मज्जा लिन सक्नेछन् ।”
