निर्देशक चन्द्रको चलचित्र ‘आ बाट आमा’ शुभमुहूर्त सम्पन्न


काठमाडौं। आर्या इन्टरटेन्मेन्टको ब्यानरमा निर्माण हुने चलचित्र ‘आ बाट आमा’ को बिहीबार तनहुँको गलेश्वर मन्दिरमा शुभ मुहूर्त गरिएको छ। करिब २ सय जना बटुकहरुले हवनसहित पूजाआर्चना गरी चलचित्रको मुहूर्त गरेका थिए।

निर्माण पक्षका अनुसार चलचित्रको छायांकन चितवनबाट सुरु गरिएको छ। निर्देशक चन्द्र पन्तले चलचित्रको छायांकन तालिका करिब एक महिनाको रहेको जानकारी दिएका छन्। उनका अनुसार चितवन, काठमाडौं र भारतको हैदरावादमा चलचित्र खिचिनेछ।

चलचित्रमा अभिनेता पल शाह, दक्षिण भारतीय कलाकार प्रदीप रावत, विपना थापा, सिम्रन पन्त, उषा उप्रेतीलगायत मुख्य भूमिकामा देखिनेछन्। मुहूर्त कार्यक्रममा प्रदीप रावतसहित गजित बिष्ट, माओत्से गुरुङ लगायतको उपस्थिति थियो।

‘आ बाट आमा’ ले आमा र सन्तानबीचको स्नेह र सम्बन्धको भावनात्मक कथा बोकेको निर्माण पक्षको भनाइ छ।

चलचित्रका निर्माता कृष्णप्रसाद सुवेदी, ध्रुव न्यौपाने र प्रकाशजंग कुँवर हुन् भने कार्यकारी निर्माता करण सिंह रहेका छन्। छायांकन नवराज उप्रेतीले सम्हाल्ने छन्। संगीत कोशिस क्षेत्री, बाबुल गिरी र थानेश्वर गौतम रहनेछ मुख्य सहायक निर्देशक कुलदीप शर्मा रहेका छन्।

चलचित्र २०८२ फागुन १५ गतेबाट देशभर प्रदर्शनमा आउनेछ। निर्माण पक्षका अनुसार चलचित्रको विदेश प्रदर्शन अधिकार अष्ट्रेलिया र न्यूजिल्यान्डमा बिक्री भइसकेको छ। ती देशका लागि वितरण अधिकार हिमारु इन्टरटेन्मेन्टले खरिद गरेको छ भने नेपालमा आरआर फिल्म्सले वितरणको जिम्मा लिएको छ।

सेलिब्रिटी नेपाल.कम

सूचना तथा प्रसारण विभाग दर्ता नम्बर ५३७ – २०७३ / ०७४

संचालक / प्रकाशक: कल्पना सापकोटा
सम्पादक: आनन्द अधिकारी
समाचार प्रमुख: रघुनाथ सापकोटा
सम्पर्क:
call/whatsapp: +977 9851071873 | email: celebritynepal@gmail.com

Supported by Glamour Nepal | Shopping Partner: Kavya Online Store

Copyright © 2012 - 2025 | All Right Reserved.