उत्कृष्ट प्रस्तुति दिएर ‘द भ्वाइस अमेरिका’ को शीर्ष १३ मा प्रवेश गर्न सफल भईन परिजिता बाँस्तोला

काठमाडौं । नेपाली मूलकी १७ वर्षिया परिजिता बाँस्तोला अमेरिकी द भ्वाइसको २२ औ संस्करणको अर्को चरणमा प्रवेश गर्न सफल भएकी छिन् । कोच जोन लिजेन्डको तर्फबाट उनले लेडी गागाको ‘आई विल नेभर लभ अगेन’ बोलको गीत गाएर शीर्ष १३ मा प्रवेश गर्न सफल भएकी हुन् । उनको गीत सुनेर चारै जना कोचले उत्कृष्ट प्रस्तुति दिएको भन्दै तारिफ गरे ।

गत नोभेम्बर १४ सोमबारका दिन भएको प्रस्तुतिसँगै मतदान सुरु भएको थियो । अमेरिका, नेपाल लगायत विश्वभरि छरिएर रहेका नेपाली समुदायले परिजितालाई समर्थन गर्दै मतदान गरेका थिए । द भ्वाइसका निर्णायक र प्रशिक्षकहरुको छनौट र रोजाइको कारण परिजिता शीर्ष १६ मा पुग्न सफल भएता पनि १३ औ स्थानमा पुग्न केवल जनताको मतदानबाट मात्र सम्भव भएको हो ।