सेलिब्रेटी नेपाल काठमाडौँ
अनुपविक्रम शाही तथा सन्ध्या केसी मुख्य भूमिकामा रहेको चलचित्र ‘कमलेको बिहे’को फर्स्टलुक सार्वजनिक भएको छ । राजधानीमा आयोजित एक कार्यक्रमका बीच निर्माण टिमले चलचित्रको पोस्टर तथा गीत रिलिज गरेको छ ।
कार्यक्रममा मिडियाकर्मीमाझ चलचित्रको ट्रेलर पनि देखाईएको छ तर युट्युवमा भने ट्रेलर जेठ १५ मा मात्र आउनेछ । नामले नै कमेडी लाग्ने कमलेको भुमिकामा अनुपविक्रम प्रस्तुत छन् भने सन्ध्या चमेलीको भुमिकामा छिन् ।
कार्यक्रममा बोल्दै निर्देशन प्रसन्न पौड्यालले नेपाली समाजमा चल्दै आएको मागी विवाह र प्रेम विवाहबीचको द्वन्द्वको कथा नै फिल्मको सार रहेको बोले । पछिल्लो पुस्ताका युवा युवतीले आफु खुसी जीवनसाथी खोज्ने क्रम बढ्दो हुँदा परिवारबाट त्यसमा उत्पन्न हुने बाधा व्यवधानको प्रभाव फिल्मले बोल्नेछ । निर्देशकको यति कुरा बाहिर आउँदै गर्दा फिल्मको ट्रेलर तथा गीतले प्रश्न छाडेको छ कि, कमलेले चमेलीलाई भगाउन सक्यो कि सकेन् ? अभिनेता अनुप भने कार्यक्रममा कारणबस अनुपस्थित रहे ।
चलचित्र लाइ छायाँकार विदुर पाण्डेले खिचेका हुन् । महेश दवाडीको कथा, पटकथा तथा संवाद समावेश ‘कमलेको बिहे’मा अनुप र सन्ध्यासँगै विनोद न्यौपाने, इशान ढकाल, दिपक पहाडी, रेशु तामाङ, कुलद्विप अधिकारी र लिरण लाकौल लिड अभिनयमा छन् । सरिता मुभिज क्रियशनको व्यानरमा बनेको फिल्ममा सरिता लामाको लगानी छ भने कार्यकारी निर्मातामा दिपक विष्ट ‘गौली’ रहँदा लगानीमा साझेदारी प्रतिक तामाङ, सुनिल विष्ट र मिलन लामाले गरेका छन् ।
राजनराज शिवाकोटी, शिखर सन्तोष र वावुल गिरीको संगीत रहेको फिल्ममा समावेश गीतमा शिवाकोटीसँगै माण्डवी त्रिपाठी, युवराज चौलागाईं, समिर आचार्य र अरुणदेव यादवको स्वर छ । सम्राट वस्नेतको द्वन्द्व निर्देशन रहँदा नृत्य निर्देशन दिपकमान सिंहले गरेका छन् । तारा थापा ‘किम्भे’ चलचित्रका सम्पादक हुन् । चलचित्र प्रदर्शन मिति भने अहिले सार्बजनिक गरिएको छैन ।
