सम्पादकीय
नेपाली मनोरञ्जन क्षेत्रको समाचार, गतिविधि र कलाकारका सिर्जनात्मक यात्रालाई निरन्तर पाठकमाझ पुर्याउँदै आएको सेलिब्रेटी नेपालले १४ वर्षको सफल यात्रा पूरा गरी १५औँ वर्षमा प्रवेश गरेको छ। यो केवल एउटा अनलाइन सञ्चारमाध्यमले वर्षगाँठ मनाएको अवसर मात्र होइन, नेपाली मनोरञ्जन पत्रकारितामा निरन्तरता, विश्वसनीयता र जिम्मेवारीको एउटा महत्वपूर्ण यात्राको उत्सव पनि हो।
१४ वर्षअघि नेपाली मनोरञ्जन क्षेत्रमा डिजिटल माध्यमको प्रभाव विस्तार हुँदै गर्दा सेलिब्रेटी नेपालले आफ्नो यात्रा सुरु गरेको थियो। त्यो समयदेखि आजसम्म प्रविधि परिवर्तन भयो, पाठकको रुचि परिवर्तन भयो, समाचार प्रस्तुत गर्ने शैली परिवर्तन भयो र मनोरञ्जन क्षेत्र स्वयं पनि तीव्र गतिमा अघि बढ्यो। तर समयसँगै आफूलाई परिवर्तन गर्दै सत्य, तथ्य र विश्वसनीय समाचार सम्प्रेषण गर्ने मूल उद्देश्यमा सेलिब्रेटी नेपाल अडिग रह्यो।
नेपाली चलचित्र, संगीत, कला, साहित्य, टेलिभिजन तथा समग्र मनोरञ्जन क्षेत्रका कलाकार, सर्जक, निर्माता, निर्देशक, प्राविधिक र पर्दापछाडि रहेर काम गर्ने सम्पूर्ण व्यक्तित्वका गतिविधिलाई प्राथमिकताका साथ स्थान दिनु सेलिब्रेटी नेपालको यात्राको महत्वपूर्ण पक्ष हो। स्थापित कलाकारदेखि नयाँ पुस्ताका प्रतिभासम्मलाई समान रूपमा अवसर र स्थान दिने प्रयास हाम्रो निरन्तर प्रतिबद्धता रहँदै आएको छ।
आज डिजिटल पत्रकारिता चुनौतीपूर्ण बन्दै गएको छ। सामाजिक सञ्जालमा केही सेकेन्डमै सूचना फैलिन्छ। समाचारभन्दा पहिले हल्ला पुग्ने अवस्था छ। यस्तो समयमा सञ्चारमाध्यमका लागि सबैभन्दा ठूलो चुनौती विश्वसनीयता जोगाउनु हो। क्लिक र भ्युजको प्रतिस्पर्धाभन्दा माथि उठेर सही सूचना पाठकमाझ पुर्याउनु हाम्रो प्राथमिकता हो भन्ने विश्वास सेलिब्रेटी नेपालले राख्दै आएको छ।
हामीले १४ वर्षको यात्रामा धेरै सफलता देख्यौँ, धेरै चुनौती सामना गर्यौँ र नेपाली मनोरञ्जन क्षेत्रका अनेकौँ उतारचढावलाई नजिकबाट नियाल्यौँ। कलाकारका सफलता, चलचित्रका उपलब्धि, नयाँ प्रतिभाको आगमन, उद्योगका समस्या र सम्भावनालाई पाठकमाझ पुर्याउने क्रममा हामीले पाएको माया, विश्वास र साथ नै हाम्रो सबैभन्दा ठूलो उपलब्धि हो।
१५ औँ वर्षमा प्रवेश गर्दै गर्दा हाम्रो जिम्मेवारी अझ बढेको महसुस गरेका छौँ। आगामी दिनमा सेलिब्रेटी नेपाललाई अझ विश्वसनीय, प्रभावकारी र समावेशी मनोरञ्जन समाचारको डिजिटल प्लेटफर्म बनाउने हाम्रो लक्ष्य छ। नेपाली कला र मनोरञ्जन क्षेत्रका सकारात्मक पक्षलाई प्रवर्द्धन गर्दै उद्योगभित्रका समस्या, बहस र आवश्यक विषयलाई पनि जिम्मेवार पत्रकारितामार्फत उजागर गर्नेछौँ।
यो यात्रामा हामीलाई विश्वास गर्ने सम्पूर्ण पाठक, कलाकार, सर्जक, निर्माता, निर्देशक, प्राविधिक, चलचित्रकर्मी, विज्ञापनदाता, शुभेच्छुक तथा सहकर्मी सञ्चारकर्मीप्रति हार्दिक आभार व्यक्त गर्दछौँ।
१५औँ वर्षमा प्रवेशको अवसरमा सम्पूर्ण पाठक तथा शुभेच्छुकमा हार्दिक धन्यवाद।
