काठमाडौँ। म्युजिक भिडियो र टेलिचलचित्रमार्फत आफ्नो अभिनय प्रतिभा स्थापित गर्दै आएकी कलाकार समिया कार्की अब ठूलो पर्दामा देखिने भएकी छन्। रघुजी फिल्म्सको ब्यानरमा निर्माण हुन लागेको चलचित्र ‘तीन तिघ्रे क्या बिग्रे’ मा उनी मुख्य भूमिकाका लागि अनुबन्धित भएकी हुन्।
टेलिचलचित्र ‘सीता’ मा सीताको नन्दको भूमिकाबाट दर्शकमाझ परिचित बनेकी समियाको यो पहिलो चलचित्र हो। डेब्यु चलचित्रमै मुख्य भूमिकामा अभिनय गर्ने अवसर पाएकी उनी यसलाई आफ्नो अभिनय यात्राको महत्वपूर्ण सुरुआतका रूपमा लिएकी छन्। नयाँ टिमसँग काम गर्न पाउँदा उत्साहित रहेको बताउँदै उनले अनुभवी कलाकारहरूसँग सहकार्य गर्न पाउनु आफ्नो लागि सिकाइ र अवसर दुवै भएको प्रतिक्रिया दिइन्।
चलचित्रमा चर्चित गायक पशुपति शर्मा तथा लोकप्रिय गायिका अन्जु पन्तकी छोरी परितोषिका पन्त पनि मुख्य भूमिकामा देखिनेछन्। यी दुवै कलाकारका लागि पनि यो पहिलो चलचित्र हुनेछ।
निर्देशक अमरदीप सापकोटाका अनुसार चलचित्र कमेडी जनरामा निर्माण हुनेछ, जसले दर्शकलाई हँसाउनुका साथै समसामयिक विषयवस्तुहरूलाई मनोरञ्जनात्मक शैलीमा प्रस्तुत गर्नेछ। हास्य, रमाइलोपन र सामाजिक सन्देशको संयोजनमा तयार हुने चलचित्रले सबै उमेर समूहका दर्शकलाई आकर्षित गर्ने निर्माण टिमको विश्वास रहेको छ।
