सिमानामा ‘काँडेतार’ किन?

काठमाडौँ। नक्कली भुटानी शरणार्थी भष्ट्राचारको चर्चा सँगै सिमानामा काँडेतारको आवश्यकताबारे व्यापक छलफल हुन थालेको छ। यस्तो छलफल सेन्सर बोर्डले चलचित्र ‘काँडेतार’ लाई रोक लगाएपछि त्यस निर्णयका विरोधमा ग्रेटर नेपाल महाअभियानले आयोजना गरेको पत्रकार सम्मेलनमा भएको थियो। पत्रकार सम्मेलनमा ‘काँडेतार’ चलचित्रका नायक, निर्माता, निर्देशक नवल खड्काले भने ‘यदि नेपाल भारतको सिमानामा काँडेतार भइदिएको भए नक्कली भुटानी शरणार्थी जस्तो भष्ट्राचार हुन सक्दैनथ्यो र हाम्रो मुलुकको अन्तर्राष्ट्रिय बेइजति हुदैनथ्यो’। उनले काँडेतार चलचित्र निर्माण गर्नुपर्ने कारणबारे बताउँदै भने यो चलचित्र वास्तवमा खुला सिमानालाई नियमित गरी सिमानामा काँडेतार वार लगाउनु पर्छ भन्ने खुल्ला प्रस्ताव हो र अभियान हो। यो सिमाङ्कन गर्ने बैज्ञानिक आधार हो र उपाय हो। यसले सँधियार मुलुकबीच विवाद साम्य गर्छ। यसले आवागमनको ऐतिहासिकता र परम्परालाई नियमित गरेर सीमाको रक्षा र सीमावारपार शान्ति कायम गर्छ।

यसले मानवको जथाभावी आवतजावतलाई त रोक्छ नै साथै महामारीसमेत रोक्छ। तर हामीले सिमानामा काडेतारको औचित्यबारे बुझ्न सकेनौ भने नक्कली भुटानी शरणार्थी जस्ता अनेकन काण्डहरु भइरहनेछन् र नेपाल देश भुगोलमा होइन गुगलमा सर्च गर्नुपर्ने दिन आउन सक्छ खड्काले चेतावनी दिए। आयोजक संस्था ग्रेटर नेपाल महाअभियानका अध्यक्ष डा.सुरेन्द्र ढकालले ” काँडेतार” चलचित्रलाई सरकारले रोक्न नमिल्ने भन्दै, राज्य र सरकारमा रहेका अनेकन पात्रहरुका सोचाइ र कार्यहरु राष्ट्रवाद विरोधी र देशको हित विरोधी भएको आराेप समेत लगाए। त्यसैगरी चलचित्रलाई सेन्सर पास नगरेको विरोधमा बिराटनगरको ट्राफिक चोकमा पनि एक बिरोध सभा भएको छ।