काठमाडौं । बलिउड अभिनेता विवेक आनन्द ओबराय नेपाल आइपुगेका छन् । सपरिवार दशदिने नेपाल भ्रमणका लागि बुधबार बेलुका उनी काठमाडौं आइपुगेका हुन् ।
नेपाली व्यवसायी पुनम यादवको पहलमा नेपाल आएका उनले पशुपतिनाथ मन्दिरको दर्शनसँगै सगरमाथा बेसक्याम्प, पोखरा, लुम्बिनी लगायतको भ्रमण गर्नेछन् ।
त्रिभुवन विमानस्थलमा अवतरण गरेपश्चात उनलाई नेपालको राष्ट्रिय झण्डा प्रदान गरियो भने नेपाली ढाकाटोपी पनि लगाइयो । विमानस्थलमा उनले सञ्चारकर्मीसँग उनले नेपाल भ्रमणको उद्देश्यबारे संक्षिप्त कुराकानी समेत गरे । सो क्रममा उनले बुवाआमा पहिला कयैनपटक नेपाल आएता पनि आफू पहिलो पटक आएका बताए । नेपाल आउने रहर पहिलै भएता पनि अहिले समय जुरेकाले आफू परिवारसँगै आएको उनले सुनाए ।
नेपाल र भारत उस्ता उस्तै लाग्ने बताउँदै आफ्ना बच्चाहरूलाई पवित्र स्थल पशुपति र लुम्बिनी घुमाउने अठोटले नेपाल आएको उनको भनाई थियो । विवेकले केही अगाडि एक भिडियो सन्देश जारी गर्दै नेपालमा भ्रमणबारे जानकारी दिएका थिए ।
उनी २४ डिसेम्बरमा भारत फर्कने कार्यक्रम छ ।
