काठमाडौं । सेलिब्रेटी नेपालको ब्यानरमा निर्माण हुन लागेको फिल्म ‘चिलगाडी’लाई ‘मन्त्र’का निर्देशक खिलबहादुर गुरुङले निर्देशन भएका छन् । बिहीवार सेलिब्रेटी नेपालका प्रबन्ध निर्देशक एवं फिल्मका निर्माता रघुनाथ सापकोटा र निर्देशक गुरुङबीच कागजी सम्झौता भएको हो ।
दुई वर्षअघि निर्माण घोषणा भएको ‘चिलगाडी’ मा सुरुआतमा निर्देशकमा जनकदीप पराजुली भएपनि उनले कार्यव्यस्तताका कारण समय दिन नभ्याउने भएपछि ‘मन्त्र’का निर्देशक गुरुङलाई अनुबन्ध गरिएको हो ।
कोभिड्का कारण निर्धारित समयमा छायाँकनमा जान नसकेको फिल्म अब छायाँकनको तयारीमा जुटेको छ । फिल्मको निर्देशक फाइनल भएसँगै अब कलाकार छनोटको कार्य सुरु हुने निर्माता सापकोटाले बताए । फिल्मको कथा, पटकथा तथा संवाद यम थापाले लेखेका हुन् ।
आगामी माघबाट छायांकन सुरु गर्ने तयारी रहेको सापकोटाले जानकारी दिए । फिल्मलाई सागर प्रधानले खिच्नेछन् भने अर्जुन पोखरेलको गीतमा संगीत रहनेछ । निर्देशक गुरुङका अनुसार सामाजिक विषयवस्तुमा आधारित भएर हास्य प्रधान फिल्म निर्माण हुनेछ । फिल्मले युवापुस्ताको प्रतिनिधित्व गर्दै महत्वपूर्ण सन्देश प्रदान गर्ने निर्माता सापकोटा बताउँछन् ।
‘सक्दो मेहनतका साथ स्तरीय फिल्म निर्माण गर्ने हाम्रो प्रयास रहन्छ’– निर्माता सापकोटाले भने ।
