एजेन्सी । कन्नड फिल्म ‘कान्तारा’ ले दिनहुँ नयाँ कीर्तिमान बनाइरहेको छ । अब यो फिल्मले ‘केजीएफ च्याप्टर १’ लाई उछिन्दै कन्नड उद्योगको दोस्रो सबैभन्दा धेरै कमाउने चलचित्र बनेको छ। हालै फिल्मले विश्वभर २५० करोडको कलेक्सन गरेको छ ।
‘कान्तारा’ अघि ‘केजीएफ च्याप्टर १’ र ‘केजीएफ च्याप्टर २’ ले मात्र २५० करोड कमाएका थिए । अब समग्र कमाईको कुरा गर्ने हो भने केजीएफ च्याप्टर २ मात्र कान्ताराभन्दा अगाडि छ । केजीएफ च्याप्टर २ को कीर्तिमान तोड्न लगभग असम्भव देखिए पनि सानो बजेटको फिल्म भए पनि यति ठूलो कलेक्सन गर्नु आफैमा कीर्तिमान हो ।
ऋषभ शेट्टी स्टारर फिल्मले हालै २५० करोडको आँकडा पार गरेको छ, अहिले फिल्मको कुल कमाई लगभग २५१ करोड पुगेको छ, जुन केजीएफ च्याप्टर १ भन्दा अलि बढी हो। जब ‘कान्तारा’ रिलिज भयो त्यतिबेला यसको कमाई निकै सुस्त थियो तर बिस्तारै जबर्जस्त माउथ पब्लिसिटीको कारणले फिल्म कमाईको हिसाबले अगाडि बढ्यो ।
आइएमडिबीमा उत्कृष्ट रेटिङ प्राप्त गर्ने सन्दर्भमा ‘कान्तारा’ पहिलो साबित भएको छ । आईएमडीबीमा उत्कृष्ट रेटिङ प्राप्त गर्ने सर्वोत्कृष्ट भारतीय चलचित्र बनेको ‘कान्तारा’ले यहाँ पनि कीर्तिमान बनाएको छ । यसअघि यो कीर्तिमान’ केजीएफ २’ को नाममा थियो ।
कन्नड भाषामा फिल्मको दमदार प्रदर्शन देखेर फिल्मका निर्माताले अन्य भाषामा पनि रिलिज गरेका छन्, जसको नतिजा सबैका अगाडि छ । फिल्मले अहिलेसम्म हिन्दी भाषामा मात्रै ३१.७ करोड रुपैयाँ कमाएको छ, यो संख्या हालै रिलिज भएका धेरै हिन्दी फिल्मको कलेक्शनभन्दा बढी हो । हिन्दी बाहेक, यसलाई तमिल र तेलुगुमा पनि डब गरिएको छ।
