काठमाडौं । ज्ञानेन्द्र देउजा निर्देशित चलचित्र ‘झिँगेदाउ’को टाइटल टिजर सार्वजनिक गरिएको छ । युट्युबमार्फत सार्वजनिक गरिएको ३० सेकेण्डको टिजरमा झिँगा, सिक्का र चलचित्रकी मुख्य अभिनेत्री केकी अधिकारीको स्वर सुन्न सकिन्छ । निर्देशन देउजाले सार्वजनिक टाइटल टिजरबाट चलचित्रको कथासार बुझाउन खोजेकोे बताए । निर्मातासमेत रहेका देउजाले ‘झिँगेदाउ’को अर्थ बुझाउन पनि आफूने टाइटल टिजर सार्वजनिक गर्नुपरेको खुलाए ।
आगामी भदौ १७ गतेबाट नेपालभरका चलचित्र हलमा रिलिज यो चलचित्र रिलिज हुनेछ । चलचित्रको पोस्ट प्रोडक्सनको सम्पूर्ण काम सकिएकाले अब आफू पूर्ण रुपमा चलचित्रको प्रचारमा केन्द्रित रहेको निर्देशक देउजाले बताए ।
कपनगढी सिनेमा र फिल्म क्रियू नेपालको ब्यानरमा निर्माण भएको चलचित्र भीमनिधि तिवारीको कथा ’झिँगेदाउ’मा आधारित रहेको छ । प्रदीप भारद्वाजको पटकथा तथा संवाद रहेको चलचित्रमा अर्जुन पोखरेलको संगीत, बिष्णु घिमिरेको छायांकन, मित्र डि. गुरुङको सम्पादन छ । सुलभ प्रतिक देउजा र समीक्षा देउजा निर्माता रहेको चलचित्रका सह–निर्माताको रुपमा सुशील दाहाल र ईश्वर घिमिरे रहेका छन् ।
चलचित्रमा केकी अधिकारी, आँचल शर्मा, मुकुन भुषाल र कुशल बिष्टको मुख्य भुमिका रहेको छ । चलचित्रमा केकी र आँचल जेठानी–देउरानीको भूमिकामा देखिने छन् । रामजी लामिछानेकको कोरियोग्राफी रहेको, केहीदिन अघि श्रीकाली चौरमा खिचिएको चलचित्रको गीत आगामी हप्ता रिलिज गर्ने तयारी भैरहेको छ ।
