काठमाडौं । चलचित्र ‘हिजो आजका कुरा’ असोजमा प्रदर्शनमा आउने भएको छ । निर्माण टिमले चलचित्रलाई असोजमा प्रदर्शन गर्ने निर्णय गरेको हो । यो चलचित्रले कोरोना महामारीअघि निर्माण सकिएर २०७७ को बैशाख १२ गतेका लागि प्रदर्शन मिति तोकेको थियो ।
तर, कोरोना महामारीका कारण निर्धारित समयमा चलचित्र प्रदर्शन हुन् पाएन् । निर्माता तथा कलाकार सन्तोष पन्तका अनुसार अब यो चलचित्र असोजको २८ गतेदेखि प्रदर्शन हुने भएको छ । ‘असोज २८ गतेको डेट छानेका छौं । दशैं पछि र तिहार अघिको समयमा चलचित्र प्रदर्शनमा आउने भएको हो’– पन्तले भने ।
पन्त फिल्म प्रोडक्सनको प्रस्तुति रहेको चलचित्र ‘हिजो आजका कुरा’ सन्तोषका छोरा साकार पन्तको निर्देशनमा बनेको हो ।
नेपाल टेलिभिजनमा प्रसारण भएको हास्य सिरियल ‘हिजो आजका कुरा’ नाम सापटी लिएर चलचित्र निर्माण गरिएको हो । उक्त सिरियल टेलिभिजन इतिहासको सर्वाधिक लोकप्रिय सिरियल मानिन्छ । पारिवारिक कथावस्तुमा निर्माण गरिएको चलचित्रमा सिरियलकै मुख्य जोडी सन्तोष पन्त र रमा थपलिया मुख्य भूमिकामा छन् । चलचित्रमा केकी अधिकारी, ऋचा शर्मा, रीमा विश्वकर्मा, दिव्यदेव पन्त, साकार पन्त, जयनन्द लामा, रमेश अधिकारी, जेबिका कार्की लगायतको समेत मुख्य भूमिका छ ।
