काठमाडौं । आउँदो बैशाख २३ गतेदेखि प्रदर्शनको तयारीमा रहेको चलचित्र ‘लक्का जवान’को ट्रेलर सार्वजनिक गरिएको छ । हास्य कलाकारितामा ख्याती कमाएका शिवहरि पौड्यालको निर्देशनमा बनेको चलचित्रको मंगलबार एक कार्यक्रमकाबीच ट्रेलर सार्वजनिक गरिएको हो । कमेडी धारमा सामाजिक विषयवस्तुमा निर्माण गरिएको चलचित्रको ट्रेलरमा कमेडीलाई नै प्राथमिकता दिईएको छ ।
शिवहरिकै कथा तथा संवाद रहेको चलचित्रमा दीलिप रायमाझी, प्रियंका कार्की, सलोन बस्नेत, वर्षा शिवाकोटी, सरोज खनाल, किरण केसी, राजाराम पौड्याल, शिवहरि पौड्याल, सुशील पोखरेल लगायतका कलाकारहरुको अभिनय छ । अधिकांश कलाकारहरुलाई टे«लरमा स्थान दिईएको छ । वरिष्ठ अभिनेता मदनकृष्ण श्रेष्ठ समेत टे«लरमा प्रस्तुत छन् ।
यो चलचित्र कोरोनाअघि नै निर्माण सम्पन्न भएर प्रदर्शनका लागि तयार थियो । तर कोरोना संक्रमणका कारण निर्माण सकिएको तीन वर्षपछि चलचित्र प्रदर्शनमा आउन लागेको हो । अनुसुया श्रेष्ठ वन्त निर्माता रहेको चलचित्रको कार्यकारी निर्मातामा किरण केसी, शिवहरी पौड्याल र दीलिप रायमाझी छन् । चलचित्रमा समावेश ‘मुसुक्कै हाँस न माया’ गीत यसअघि हिट भैसकेको छ ।
