काठमाडौं। बेलायत निवासी अभिनेता तथा निर्माता बिक्रम डि जोशी आफ्नो चलचित्र ‘हेल्लो जिन्दगी’ को प्रचार प्रसारका लागि शुक्रबार काठमाडौं उत्रिएका छन् । उनलाई निर्देशक एभरेष्ट सूर्य बोहरा, मुख्य सहायक निर्देशक सुदीप कुँवर,सहनिर्मात्री तथा अभिनेत्री सविता गुरुङ
लगायतका कलाकर्मीले त्रिभुवन अन्तरराष्ट्रिय विमानस्थलमा स्वागत गरेका छन् । सपरिवार स्वदेश आएका उनलाई विमानस्थलमा पञ्चकन्याले स्वागत गरेका थिए ।
चैत १८ देखि प्रदर्शन आउने ‘हेल्लो जिन्दगी’ मा बिक्रम प्रमुख भूमिकामा छन् । उनले करिब चार वर्षपछि यही चलचित्रको प्रमोशन तथा रिलिजका लागि आफू मातृभूमि फर्किएको बताए । हरेक कोणबाट फिल्म गुणस्तरिय बनेकाले आफू निकै आशावादी रहेको उनले सुनाए । बिक्रम पत्नी तथा ‘हेल्लो जिन्दगी’ की निर्मात्री हिराल जोशीले विषयवस्तु राम्रो भएकाले दर्शकले चलचित्र मन पराउने विश्वास व्यक्त गरिन् ।
‘हेल्लो जिन्दगी’ मा बिक्रमका साथमा प्रियंका कार्की, विल्सन बिक्रम राई, बिक्रान्त बस्नेत, निर्देशक बोहरा, सबिता गुरुङ, सनमकुमार बैराग, बिभिया श्रेष्ठ, जानकी पन्त जुन, ध्रुव दत्त, कुमुद पन्तलगायतको अभिनय छ ।
सत्य घटनाबाट प्रभावित चलचित्रको निर्माता बिक्रम डि जोशी र हिराल जोशी हुन् भने कार्यकारी निर्मातामा सृजना जोशी महर्जन, सहनिर्मात्रीमा सबिता गुरुङ छिन् ।
महारानी इन्टरटेन्मेन्ट युके र एभरेष्ट सूर्य बोहरा फिल्म्ससंगको सहकार्यमा बिरञ्जना इन्टरटेन्मेन्टको प्रस्तुति रहेको फिल्ममा डि क्रिएटिभ स्टुडियो, युके र काम्मा इन्टरटेन्मेन्ट, इन्डिया लाइन प्रोड्युसर छन् ।
‘हेल्लो जिन्दगी’ को केही दिनअघि ‘कता कता’ बोलको रोमान्टिक गीत सार्वजनिक गरिएको थियो । अब छिट्टै नै लोक शैलीको एक गीत दर्शकमाझ ल्याउने तयारी गरिएको जानकरी निर्देशक बोहराले दिए ।
