काठमाडौं । वरिष्ठ पाइलट तथा कलाकार विजय लामा कोरोना संक्रमणमुक्त भएर घर फर्किएका छन् । १७ दिन लामो अस्पताल बसाईपछि कोरोना संक्रमणमुक्त भएर बिहीबार साँझ घर फर्किएको उनले जानकारी दिएका छन् । उनले सबैको सबैको माया, साथ र प्रार्थनाको कारण नयाँ जीवन मिलेको बताएका छन् ।
सामाजिक सञ्जालमा उनले कोरोना निको भएर घर फर्किदाको आनन्दलाई बयान गर्न नसक्ने बताएका छन् । उनले ‘नयाँ जीवनको सुरुवाती’ भएको जस्तो लागेको बताएका छन् । उनले अब आफू देश र नेपाली दाजुभाई, दिदी बहिनीहरुको लागि समर्पित भएर जिवनमा अघि बढ्ने बताएका छन् ।
कोरोना संक्रमण पुष्टि भएपछि उनी स्टार अस्पतालको आईसोलेसनमा उपचाररत थिए । कोरोना पुष्टि भएसंगै थुप्रै चलचित्रकर्मीहरुले क्याप्टेन तथा कलाकार लामाको स्वास्थ्य लाभको कामना गरेका थिए । कोरोना पुष्टिपछि उनको स्वास्थ्यमा गम्भीर समस्या समेत देखिएको थियो ।
