राजेश पायल फाउण्डेशनलाई ‘जय भोले’को सहयोग

सेलिब्रेटी नेपाल
काठमाडौं । चलचित्र ‘जय भोले’ यूनिटले राजेश पायल राई फाउण्डेशनलाई आर्थिक सहयोग गरेको छ । बिहीबार चलचित्रको ट्रेलर सार्वजनिक कार्यक्रममा निर्देशक तथा कलाकार अशोक शर्माले फाउण्डेसनका संस्थापक तथा गायक राजेशपायल राईलाई २५ हजार रुपैयाँको चेक हस्तान्तरण गरे । २०६५ सालमा फाउण्डेशन स्थापना गरि गायक राईले अनाथ बालवालिकालाई सहयोग गर्दै आएका छन् ।

गायक राईले अशोकको ‘गरिब’ चलचित्रमार्फत पाश्र्व गायनमा प्रवेश गरेका थिए ।
आफ्नो चलचित्रमार्फत पाश्र्व गायनमा प्रवेश गरेका राई अहिलेका व्यस्त गायक बन्न सफल भएकोमा अशोकले खुसी व्यक्त गरे । उनले आफूहरुको सहयोगले फाउण्डेशनलाई सानो भएपनि सहयोग मिल्ने विश्वास व्यक्त गरे । यता राजेशपायले धन्यवाद दिँदै लामो समयपछि पुनः अशोकको चलचित्रमा जोडिन पाएकोमा खुसी व्यक्त गरे । उनले आफ्नो सांगितिक कमाईको ५ प्रतिशत रकम फाउण्डेशनलाई छुट्याउँदै आएको बताए ।