काठमाडौं । आगामी जेठ १५ गतेदेखि प्रदर्शनमा आउन लागेको नेपाली चलचित्र ‘कुम्भ’ को एक्सन प्याक ट्रेलर सार्वजनिक गरिएको छ । निर्माण टिमले सोमवार आरएए डिजिटल नेपाल मार्फत एक्सन प्याक ट्रेलर रिलिज गर्दै दर्शकमाझ चलचित्रप्रतिको उत्सुकता थप बढाएको हो । ३ मिनेट १३ सेकेन्ड लामो ट्रेलरले बदलाको कथा भन्छ। एक्सन जनराको ट्रेलरले दर्शकको मन जित्नेमा निर्माण टिम ढुक्क देखिएको छ।
‘कुम्भ’ एक्सन तथा सामाजिक कथावस्तुमा आधारित चलचित्र हो । चलचित्रमा अशोक आर्यन, सृष्टि खड्का, सुनिल थापा, रोहित रुम्बा, सुशील पोखरेल, रोबर्ट सिंह, सुरेन्द्र ठाकुर, अफ्सना थापा, आरजे सापकोटा, मुन्ना सर्राफ लगायत कलाकारहरूको अभिनय रहेको छ ।
चलचित्रको लेखन, निर्देशन, छायांकन तथा सम्पादन रन्धिर श्रेष्ठ स्वयंले गरेका हुन् । चलचित्रमा सम्राट बस्नेत, प्रदीप खड्का (भारत), सञ्जय थापा र कुमार महर्जन को एक्सन निर्देशन रहेको छ भने कोरियोग्राफी रोबर्ट सिंहले गरेका छन् ।
आरएएस प्रोडक्सनको ब्यानरमा निर्माण भएको चलचित्र आगामी मे २९ अर्थात् जेठ १५ गतेदेखि नेपालभर प्रदर्शनमा आउने तयारीमा रहेको छ । चलचित्रको यस अघि सार्वजनिक गीत र टिजरले राम्रो चर्चा पाउन सफल भएको छ।
