काठमाडौं । नेपाली फिल्मका उदाउँदा अभिनेता गौरव बिष्टले आफ्नो आगामी फिल्म ‘एक मुठी बादल’का लागि ९ केजी तौल घटाएका छन् ।
रंगमञ्चबाट अभिनय यात्रा सुरु गरेका गौरवले फिल्म क्षेत्रमा पनि राम्रो फड्को मारिरहेका छन् । उनले दुई वर्षअघि फिल्म ‘परस्त्री’बाट डेब्यु गरेका थिए भने अब ‘एक मुठी बादल’मार्फत दर्शकमाझ पुनः प्रस्तुत हुँदैछन् ।
हालै सार्वजनिक गरिएको क्यारेक्टर पोस्टरमा गौरवको लुकले ध्यान तानेको छ । पोस्टरमा उनको वास्तविक जीवन र फिल्मको पात्रबीच स्पष्ट फरक देखिन्छ ।
यस भूमिकाका लागि उनले करिब ९ केजी तौल घटाउँदै आफूलाई पात्रअनुसार पूर्ण रूपमा रूपान्तरण गरेका छन् । क्यारेक्टरमा डुब्नका लागि उनले गरेको मेहनत फिल्ममा प्रष्ट देखिने विश्वास गरिएको छ ।
फिल्ममा गौरवसँगै अभिनेत्री आँचल शर्मा लगायतका कलाकारको अभिनय रहेको छ । अब उनको अभिनय कत्तिको प्रशंसित हुन्छ भन्ने कुरा भने फिल्म जेठ १ गतेबाट प्रदर्शनमा आएपछि थाहा हुनेछ ।
