काठमाडौं। विवश कुमार माझी र मोहन केसीको निर्देशनमा तयार भएको फिल्म ‘बुकी’को पहिलो प्रिमियर शो जापानमा आयोजना गरिने भएको छ।
फिल्मको निर्माण पक्षले मुख्य पात्रहरूको झलक सार्वजनिक गर्दै जापान प्रिमियरको मिति र स्थान तय गरेको हो।
फिल्मको ‘वर्ल्ड प्रिमियर’ सन् २०२६ मे ६ तारिख, बुधबारका दिन जापानको ओसाका सहरमा हुनेछ। ओसाकास्थित ‘मिनातो कुमिन सेन्टर’मा बेलुका ५:३० बजेदेखि ९:३० बजेसम्म विशेष प्रदर्शन आयोजना गरिने पोस्टरमा उल्लेख छ। यस प्रिमियरलाई नेपाली फिल्मको अन्तर्राष्ट्रिय बजार विस्तारको एक महत्वपूर्ण खुड्किलोका रूपमा हेरिएको छ।
सार्वजनिक पोस्टरमा फिल्मका मुख्य कलाकारहरू सुरक्षा पन्त, देबेन्द्र बब्लु, रोशनी कार्की र प्रकाश घिमिरेलाई प्रमुखताका साथ प्रस्तुत गरिएको छ। पोस्टरको पृष्ठभूमिमा भलिबलको नेट, कोर्ट र खेलाडीहरू देखाइएको छ, जसले यो फिल्म खेलकुद (विशेष गरी महिला भलिबल) र संघर्षको कथामा आधारित रहेको स्पष्ट पार्छ। साथै, हिमाली भूगोल र त्यहाँको जनजीवनलाई पनि पोस्टरमा समेटिएको छ।
पोस्टरमा अभिनेत्री सुरक्षा पन्त ‘नेपाल’ लेखिएको जर्सी लगाएर हातमा ट्रफी उचाल्दै विजय उत्सव मनाइरहेको अवस्थामा देखिन्छिन्, जसले उनको संघर्षपूर्ण र प्रेरणादायी खेल यात्राको संकेत गर्छ। अभिनेत्री रोशनी कार्की भने साधारण र हँसिलो लुक्समा देखिएकी छन्।
त्यस्तै, गायक तथा अभिनेता देबेन्द्र बब्लु जर्सीमा गम्भीर भूमिकामा प्रस्तुत छन्, जसले जिम्मेवार खेलाडीको संकेत गर्छ। दिग्गज अभिनेता प्रकाश घिमिरे ढाका टोपीमा अभिभावक वा मार्गदर्शकको रूपमा देखिन्छन् भने लक्ष्मीनाथ तिमलसिना रातो ट्र्याकसुटमा प्रशिक्षक वा टिम लिडरको भूमिकामा प्रस्तुत छन्।
‘बुकी’ हिमाली क्षेत्रमा वर्षाको समयमा फुल्ने एक विशेष फूल हो। निर्माण पक्षका अनुसार फिल्मले खेलकुद र प्रकृतिबीचको गहिरो सम्बन्धको कथा प्रस्तुत गर्नेछ। फिल्मको छायांकन काठमाडौं, पोखरा र बागलुङको रमणीय ढोरपाटन क्षेत्रमा गरिएको छ।
हिमालयन म्युजिकल इभेन्ट म्यानेजमेन्ट एन्ड फिल्म्सको प्रस्तुति रहेको यस फिल्ममा सुरक्षा पन्त, देबेन्द्र बब्लु र रोशनी कार्की मुख्य भूमिकामा छन् भने प्रकाश घिमिरे, लक्ष्मीनाथ तिमलसिना, निशा बजगाईं, घनु जोशी, अनु दाहाल, सन्दिप बाबु लोहनी लगायतका कलाकारको अभिनय देख्न सकिनेछ।
लक्ष्मण सापकोटा, अमिशा काउचा थापा मगर र रमेश थापा निर्माता रहेको फिल्ममा प्रकाश आले र राजन केसी कार्यकारी निर्माता छन्। राजेश थापा र बसुन्धरा खरेल क्रिएटिभ प्रोड्युसर हुन् भने जितु थापा र सुनील बुढाथोकी सह-निर्माताका रूपमा रहेका छन्।
फिल्ममा आशुका अर्याल एसोसिएट निर्देशक, आचार्य गोपाल चिफ असिस्टेन्ट निर्देशक र टाइग्रिस, निशा दाहाल तथा उज्वल अधिकारी सहायक निर्देशकका रूपमा रहेका छन्।
विकास गन्दर्भको डीओपी रहेको फिल्मलाई भुपेन्द्र अधिकारीले सम्पादन गरेका हुन्।
श्याम मल्लको मेकअप र थम्मन थापाको प्रोडक्सन हेडिङ रहेको फिल्मको पब्लिसिटी डिजाइन राकेश दाहालले गरेका छन्।
हालसम्म प्रदर्शनको आधिकारिक मिति तय नभए पनि निर्माण पक्षले सन् २०२६ भित्र देशभर प्रदर्शन गर्ने लक्ष्य लिएको छ।
