काठमाडौँ। गणतन्त्र दिवसको अवसर पारेर आगामी वर्षको जेठ १५ गतेदेखि प्रदर्शनमा आउने चलचित्र ‘मितज्यू’को फर्स्टलुक पोस्टर सार्वजनिक गरिएको छ।
सार्वजनिक पोस्टरमा मुख्य कलाकारहरू दयाहाङ राई, सौगात मल्ल र अभिनेत्री तेरिया मगरलाई प्रमुख रूपमा प्रस्तुत गरिएको छ। पोस्टरमा दयाहाङ र सौगात बोलेरो जिपको अगाडि बसेर एकअर्कासँग पञ्जा लडाइरहेको दृश्य देखिन्छ, जसले मित्रता र प्रतिस्पर्धाको संकेत गर्छ।
मित्रता, प्रतिस्पर्धा र संस्कृतिलाई समेटेर निर्माण गरिएको ‘मितज्यू’मार्फत विभिन्न अन्तर्राष्ट्रिय रियालिटी शोबाट चर्चा कमाएकी तेरियाले नेपाली रजतपटमा अभिनेत्रीका रूपमा डेब्यु गरेकी छन्।
पोस्टरले चलचित्रको कथा ग्रामीण परिवेशमा आधारित रहेको र विशेषगरी मगर समुदायको जनजीवन तथा संस्कृतिसँग नजिकबाट जोडिएको स्पष्ट संकेत गर्दछ।
अनिल बुढा मगरको निर्देशनमा निर्माण भएको यस चलचित्रमा दयाहाङ, सौगात र तेरियासहित पुस्कर गुरुङ, शिशिर वाङ्देल, राज थापा, सुवर्ण थापा, अनु थापा, स्मिता लामिछाने, अरुण पुन मगर, उत्तम राज पाण्डे, सविन कट्टेल, उमेश सोनाम, पवित्रा खड्का, चाहाना राना मगर, अनुशा राई तथा खड्गबहादुर पुन मगरलगायत कलाकारहरूको अभिनय रहेको छ।
जीएम मूभिज प्रोडक्सनको ब्यानरमा बनेको ‘मितज्यू’का निर्माता जनक घर्ती मगर हुन्। चलचित्रमा महेश राईको लेखन, शिशिर बिसंखेको छायांकन तथा लोकेश बज्राचार्यको सम्पादन रहेको छ।
