काठमाडौँ। १४औँ संस्करणको ‘नेपाल अफ्रिका अन्तर्राष्ट्रिय चलचित्र महोत्सव–२०२६’ यही माघ २ देखि ५ गतेसम्म चलचित्र विकास बोर्ड, चावहिलमा आयोजना हुने भएको छ।
महोत्सवमा नेपालसहित २० देशका ४३ चलचित्र छनौट भएका छन्। नेपाली विधामा कथानक, वृत्तचित्र र लघु गरी २० चलचित्र प्रदर्शन गरिने महोत्सव निर्देशक डब्बु क्षत्रीले बताए।
नेपाली कथानकतर्फ ‘अञ्जिला’, ‘कोशेढुँगा’, ‘माग्ने राजा’, ‘परान’ र ‘यो मन त मेरो नेपाली हो’ फाइनलमा पुगेका छन्। वृत्तचित्रतर्फ ‘अरिंगाल म्यान’, ‘डान्सिङ इन फायर’ र ‘अ बडी नट माइन्ड’ छनौट भएका छन्। लघु चलचित्रतर्फ खुला र विद्यार्थी गरी १० चलचित्र प्रदर्शन हुनेछन्।
अन्तर्राष्ट्रिय विधामा १९ देशका २३ चलचित्र छनौट भएका छन्। यसमा १५ लघु, तीन वृत्तचित्र, दुई कथानक र तीन अफ्रिकन चलचित्र प्रतिस्पर्धामा छन्।
महोत्सवमा चलचित्र प्रदर्शनसँगै मास्टर क्लास, अन्तरक्रिया, नृत्य कार्यशाला र चार दिने चित्रकला प्रदर्शनी पनि हुनेछ। नेपाल संगीत तथा नाट्य प्रज्ञा प्रतिष्ठान र चलचित्र विकास बोर्डको सहकार्यमा ३० जनालाई नृत्य प्रशिक्षण दिइनेछ।
