काठमाडौं। नेपाली समाजमा उत्तरदायित्व, पारदर्शिता र स्पष्ट सार्वजनिक संवादको आवश्यकता तीव्र बन्दै गएको वर्तमान सन्दर्भमा नयाँ टेलिभिजन कार्यक्रम ‘कठघरा’ले आफ्नो पहिलो औपचारिक पत्रकार सम्मेलन काठमाडौंमा सम्पन्न गरेको छ। पत्रकार सम्मेलनमा विभिन्न सञ्चारमाध्यमका प्रतिनिधि, प्रसारण साझेदार, प्रायोजक संस्था तथा विशिष्ट अतिथिहरूको उल्लेखनीय उपस्थिति रहेको थियो।
कठघरा कुनै साधारण अन्तर्वार्ता कार्यक्रम नभई प्रश्न, जवाफ र उत्तरदायित्वको मञ्चका रूपमा तयार गरिएको कार्यक्रम हो। सार्वजनिक जीवनसँग जोडिएका, सत्तामा रहेका वा प्रभावशाली भूमिकामा रहेका व्यक्तिहरूलाई जनताप्रति उत्तरदायी बनाउने उद्देश्यसहित कार्यक्रमको अवधारणा विकास गरिएको आयोजकले जानकारी दिएका छन्। विशेष गरी आगामी निर्वाचन र पछिल्लो समय युवापुस्ता, विशेषतः ‘जेन जी’ बाट उठिरहेका आवाज र आन्दोलनहरूले देशमा पारदर्शी र जबाफदेही संवादको माग बढाइरहेको अवस्थामा कठघरा ले त्यसै आवश्यकतालाई सम्बोधन गर्ने विश्वास लिएको छ।
पत्रकार सम्मेलनमा ‘कठघरा’का निर्माता थमन कुमार भण्डारीले उपस्थित सञ्चारकर्मी तथा अतिथिहरूलाई स्वागत गर्दै कार्यक्रमको उद्देश्य, अवधारणा र अपेक्षाबारे प्रकाश पारे। यस कार्यक्रममा डिजिटल पार्टनर ओएसआर डिजिटलका सञ्चालक ओम अग्रवालले कार्यक्रमले नेपाली सार्वजनिक बहसमा ल्याउने नयाँ अभ्यास र उत्तरदायित्वपूर्ण पत्रकारिताप्रतिको प्रतिबद्धता प्रस्तुत गरे।
यस अवसरमा ‘कठघरा’को आधिकारिक प्रसारणसम्बन्धी घोषणा पनि गरिएको छ। यो कार्यक्रम हिमालय टेलिभिजन एचडी र ओएसआर रियालिटी मार्फत प्रसारण हुने भएको छ। कठघरा आगामी बुधवारदेखि सुरु भई कुल १८ एपिसोड प्रसारण हुनेछ, जसअन्तर्गत हरेक बुधवार राति ठिक ८:०० बजे दर्शकहरूले कार्यक्रम हेर्न सक्नेछन्।
कार्यक्रमका निर्देशक अमन प्रताप अधिकारीले कठघरा को अवधारणा, संरचना र प्रत्येक प्रश्नको दिशाबारे आफ्नो धारणा राखे। न्यायाधीशको भूमिकामा रहेकी मिथिला शर्माले कार्यक्रमभित्र निष्पक्षता, विवेक र सन्तुलनको महत्वबारे बोलिन्। त्यस्तै, कार्यक्रमका सञ्चालक टीकाराम यात्रीले निर्भीक प्रश्न, सत्तासँग प्रत्यक्ष संवाद र जनउत्तरदायित्वलाई केन्द्रमा राखेर कार्यक्रम सञ्चालन गरिने प्रतिबद्धता व्यक्त गरे।
