काठमाडौँ । हास्य कलाकार अर्जुन घिमिरे (पाँडे) को डेब्यु निर्देशनमा तयार भएको फिल्म ‘झरीपछिको इन्द्रेणी’ को पहिलो पोस्टर सार्वजनिक गरिएको छ । आइतबार सार्वजनिक पोस्टरमा फिल्मका अधिकांश प्रमुख पात्रलाई आफ्ना–आफ्ना क्यारेक्टर लुक्समा प्रस्तुत गरिएको छ, जसले फिल्मको कथा र परिवेशबारे पहिलो झलक दिएको छ ।
नागराज इन्टरटेन्मेन्ट प्रालिको ब्यानरमा बनेको यो फिल्मबाट अभिनेता गणेश उप्रेती लामो अन्तरालपछि पर्दामा कमब्याक गर्दैछन् । अमेरिकाबाट विशेष रूपमा यो फिल्मको छायांकनका लागि नेपाल फर्किएका उनले फिल्ममा महत्वपूर्ण भूमिका निभाएका छन् । फिल्ममा गणेश उप्रेतीसँगै रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, अर्जुन घिमिरे (पाँडे), प्रियना आचार्य (मुन्नी), अंशु महर्जन, राजेन्द्र नेपाली र लक्ष्णा राईको अभिनय रहेको छ ।
यस फिल्ममार्फत कलाकार विमोचन दवाडी र जेसिका पोखरेलले नेपाली फिल्म उद्योगमा डेब्यु गर्नेछन् । बाल कलाकार दिप्सन चिलवाल पनि फिल्ममा देखिनेछन्, जसले कथालाई पारिवारिक रूपमै थप रङ दिने अपेक्षा गरिएको छ ।
निर्देशक घिमिरेकै कथा रहेको ‘झरीपछिको इन्द्रेणी’को पटकथा र संवाद गणेश कार्की र विशाल घिमिरेले गरेका हुन् । बुद्ध थापाले छायांकन गरेको फिल्ममा अनिशा सेन्दाङ लिम्बु निर्मात्री रहेकी छिन् भने अनु थापा, पंकज खड्का, सिर्जना खड्का, सुवास शर्मा र राम कार्की सहनिर्माताको भूमिकामा छन् । लाइन प्रोड्युसरका रूपमा योगेश खतिवडा र विनोद कँडेल संलग्न छन् ।
