काठमाडौं । सामाजिक न्याय र राजनीतिक चेतनालाई केन्द्रमा राखिएको फिल्म ‘बिगुल’ माघ ९ गतेदेखि देशव्यापी प्रदर्शनमा आउने भएको छ । आइतबार फिल्मको फर्स्टलुक पोस्टरसहित प्रदर्शन मिति सार्वजनिक गरिएको हो । फिल्मको निर्देशन रमेश कोइरालाले गरेका हुन् भने प्रस्तुति कल्पना पौडेलको र कथा तथा निर्माण दिनेश कोइरालाको रहेको छ ।
सार्वजनिक तीन डिजाइनका पोस्टरमध्ये एउटामा अभिनेत्री बेनिशा हमाल गम्भीर मुद्रामा देखिएकी छन्, जहाँ राँको लिएर उभिएको भीडले आन्दोलनको माहोल झल्काउँछ । अर्को पोस्टरमा बेनिशा, अभिनेता नरेन खड्का र रमेश बुढाथोकी आक्रोशित भावभंगिमामा देखिन्छन् भने तेस्रो पोस्टरले ‘बिगुल’ का प्रमुख कलाकारहरूलाई सामुहिक रुपमा प्रस्तुत गरेको छ ।
गत बैशाख दोस्रो साताबाट शुभमुहूर्तसँगै जेठदेखि छायांकन थालिएको ‘बिगुल’ त्यही मुद्दा र मागलाई लिएर तयार भएको फिल्म हो, जुन विषय लिएर जेन्जी पुस्ताले भदौ महिनामा देशव्यापी आन्दोलन चलायो । जेन्जीको आन्दोलनभन्दा करिब चार महिना अगाडि नै सोही विषयवस्तु केन्द्रित भई फिल्म निर्माण थालिनु संयोग मात्र नभई समयानुकूल संवेदनशीलता रहेको निर्माण पक्षको दाबी छ ।
‘बिगुलमा उठाइएको मूल मुद्दा र पछिल्लो जेन्जी आन्दोलनका मागहरू, देश विकास र परिवर्तनप्रति आम नेपालीको आकांक्षा सँगै मेल खाएको छ,’ कथाकार तथा निर्माता दिनेश कोइराला भन्छन्, ‘त्यसैले यो फिल्मलाई हामीले जेन्जी आन्दोलनप्रति समर्पित गरेका छौँ । फिल्मले युवा र महिलामा चेतना जगाउँदै भ्रष्टाचार र विकृति उन्मूलनका लागि परिवर्तनको बिगुल फुकेको छ । समृद्ध र विकसित नयाँ नेपालको चाहनालाई समेटेको यस फिल्मलाई विश्वभर रहेका नेपालीले अवश्य हेर्नुपर्छ भन्ने हाम्रो आग्रह छ ।’
निर्देशक रमेश कोइरालाका अनुसार ‘बिगुल’ पारिवारिक सम्बन्ध, सामाजिक न्याय र राजनीतिक सचेतनाबाट जन्मिएको कथा हो, जहाँ भुइँमान्छेका सपना, संघर्ष र बलिदानीको इतिहासलाई पर्दामा उठाइएको छ । स्वस्थ मनोरञ्जनसहित समाज रूपान्तरणका पक्षमा आवाज बुलन्द गर्नु फिल्मको मुख्य उद्देश्य भएको उनी बताउँछन् । समाजमा महिलाले भोग्नुपरेको संघर्ष र त्यागको पारिवारिक कथा पनि फिल्मको महत्वपूर्ण पाटो बनेको छ ।
म्याग्नोलिया ग्रुपको ब्यानरमा निर्माण भएको चलचित्रमा बेनिशा हमालसँगै नरेन खड्का, रमेश बुढाथोकी, नीर शाह, सरोज खनाल, हेमन्त बुढाथोकी, शिसिर वाङ्देल, बिनोद न्यौपाने, जेएन घिमिरे, गीता अधिकारी, मीरा पण्डित, मानश्री शर्मा लगायतका कलाकारको अभिनय रहेको छ ।
चलचित्रको पटकथा र संवाद प्रदीप भारद्वाज र मौनता श्रेष्ठले तयार पारेका हुन् । शिब ढकालको छायांकन, कमल राई र कविराज गहतराजको नृत्य निर्देशन, एन भी महर्जनको द्वन्द्व निर्देशन, विश्वप्रकाश शर्मा, अर्जुन पोखरेल र मनोज चौलागाईंको संगीत, र तारा थापा ‘किम्भे’को सम्पादन रहेको छ ।
चलचित्रका सहनिर्मातामा सूर्यकान्त कोइराला र महेश कोइराला रहेका छन् ।
