काठमाडौँ । नेपाली चलचित्र उद्योगमा ३० वर्षभन्दा बढी योगदान पुर्याएका ८६ जना विशिष्ट चलचित्रकर्मीलाई संचार तथा सूचना प्रविधि मन्त्री एवम् नेपाल सरकारका प्रवक्ता पृथ्वीसुब्बा गुरुङले विशिष्ट चलचित्रकर्मी परिचय पत्र प्रदान गरेका छन् ।
चलचित्र विकास बोर्डद्वारा आयोजित उक्त कार्यक्रममा विभिन्न विधामा न्यूनतम ३० वर्ष योगदान पुर्याएका कलाकार, निर्देशक, लेखक, प्राविधिकसहितका चलचित्रकर्मीलाई परिचय पत्र वितरण गरिएको हो । बोर्डले यसअघि नै योग्य चलचित्रकर्मीलाई परिचय पत्रका लागि आवेदन मागेको थियो र मागदावी पूरा भएका ८६ जनालाई परिचय पत्र प्रदान गरिएको हो ।
परिचय पत्र प्राप्त गर्ने चलचित्रकर्मीलाई रु १ लाख ५० हजार बराबरको स्वास्थ्य बीमा सुविधा बोर्डले नै उपलब्ध गराएको छ । यस अन्तर्गत उनीहरूलाई सो रकम बराबरको औषधोपचार खर्च सरकारले सुनिश्चित गर्नेछ ।
परिचय पत्र पाउने कलाकारमध्ये पुराना कलाकार विश्व बस्नेत, सुनिल थापा, उपेन्द्र तिमल्सिना, रामकृष्ण बजगाईदेखि लिएर रमेश उप्रेती, दीपकराज गिरी, दीपा श्री निरौला र जितु नेपालसम्म रहेका छन् । कार्यक्रममा संचारमन्त्री गुरुङका साथै मन्त्रालयकी सचिव राधिका अर्याल, चलचित्रसँग सम्बन्धित संघ–संस्थाका अध्यक्ष तथा प्रतिनिधि र तीन सयभन्दा बढी चलचित्रकर्मीको उपस्थिति रहेको थियो ।
सम्बोधनका क्रममा मन्त्री गुरुङले सरकार अब चलचित्र क्षेत्रमा विशेष ध्यान दिन थालेको बताउँदै यसको विकासका लागि विभिन्न योजना अघि सारिएको जानकारी दिए । उनले भने, “फिल्म क्षेत्रको दिगो विकासका लागि सबै फिल्मकर्मी एकजुट हुनुपर्छ । साना–साना कामको थालनी भइसकेको छ, आगामी दिनमा आईटी र एआई जस्ता प्रविधिसँग अभ्यस्त हुनुपर्ने आवश्यकता छ ।”
उनले पछिल्लो समय सामाजिक सञ्जाल नियमनको विषयमा अदालतको निर्णय अनुसार दर्ता प्रक्रियालाई अनिवार्य गरिएको उल्लेख गर्दै, एक साताभित्र सामाजिक सञ्जाल दर्ता गर्ने अल्टिमेटम दिइएको जानकारीसमेत दिए । साथै नेपाल सरकारले असोज १६ गतेलाई चलचित्र दिवस घोषणा गरिसकेको र यसलाई धुमधामका साथ मनाउन निर्देशनसमेत गरे ।
त्यस्तै, कार्यक्रमको समापन गर्दै चलचित्र विकास बोर्डका अध्यक्ष दिनेश डिसीले आफू पदमा आएपछि १० महिनामा बोर्डको ९३ प्रतिशत बेरुजु फछ्र्यौट भएको र ३३ वटा काम अनलाइन माध्यमबाट दैनिक सञ्चालन भइरहेका बताए । उनले थपे, “६० वर्षदेखि बन्न नसकेको इनडोर फिल्म स्टुडियो निर्माण सुरु भएको छ, ५६ वर्षदेखि नआएको चलचित्र ऐन संसदको माथिल्लो सदनसम्म पुगेको छ, र १६ वर्षदेखि अलपत्र परेको बक्स अफिस प्रणाली सञ्चालनमा आएको छ ।”
परिचय पत्रलाई चलचित्रकर्मीको पहिचान र सम्मानको प्रतीकका रूपमा सरकारले आधिकारिक रुपमा प्रदान गरेको उनले बताए ।
विशिष्ट चलचित्रकर्मीको परिचय पत्र पाउने फिल्मकर्मीको विवरण
हालसम्म विशिष्ट चलचित्रकर्मीको परिचय पत्र पाउने फिल्मकर्मीको विवरण
