काठमाडौ। नेपाली चलचित्र ‘ऊनको स्वीटर’ को टिजर पछिल्लो समय सामाजिक सञ्जालमा चर्चामा आएको छ। टिजरको आरम्भमा ‘म पो अलमल अलमलमा परेँ हौ,’ ‘तमोर खोला,’ ‘फाक्ताङ्लुङ्ग,’ जस्ता शब्दहरूले दर्शकलाई गहिरो भावनामा डुबाएको छ। नेपाली चलचित्रमा मौलिक कथावस्तुको खोजी गर्दै आएका दर्शकहरूले यसलाई एक नयाँ र कलात्मक प्रयासका रूपमा लिएका छन्।
सामाजिक सञ्जालमा आएका प्रतिक्रियाले यो चलचित्रलाई प्रेमकथाको शुद्ध रूपको रुपमा हेर्ने दर्शकहरूको विचारलाई पुष्टि गर्छ। एक युट्युब प्रयोगकर्ताले लेखेका छन्, “प्रत्येक नेपालीलाई यसमा गर्व छ। मैले नेपाली चलचित्र उद्योगमा यस्तो कहिल्यै देखेको थिइनँ। यो असाधारण कलात्मक सृजनालाई बेवास्ता नगर्नुहोस्।”
त्यस्तै, नेपाली चलचित्रप्रति सामान्य रुचि नदेखाउने प्रताप पौडेलको प्रतिक्रिया पनि चासोपूर्ण छ। उनी लेख्छन्, “मैले नेपाली चलचित्र प्रायः हेर्दिन। हिन्दी र अङ्ग्रेजी चलचित्रहरूले बानी बिगारेका छन्। धेरैपछि, अब यो चलचित्र चाहिँ हेर्नुपर्छ कि जस्तो लाग्दैछ।”
चलचित्रका निर्देशक नवीन चौहानको शैलीप्रति प्रभावित राजीव बुढाथोकीले भनेका छन्, “इरानी चलचित्रमा देख्न पाइन्छ यस्ता दृश्यहरू।” उनको अनुसार, ‘घुमी घुमी’ मा सुन्तला लडाउनु जस्तो तरिकाले ‘ऊनको स्वीटर’ मा ऊनको डल्ला लडाउनु एक अनौठो र प्रभावकारी कलात्मक निर्णय हो।
चलचित्रमा विपिन कार्की र मिरूना मगरको प्रमुख अभिनय रहेको छ। उनीहरूको अभिनयले प्रेम र स्मृतिका गहिरा तहलाई उजागर गरेको देखिन्छ। एलेक्स पारस र परीक्षा लिम्बु जस्ता कलाकारहरूले पनि प्रेमका संवेदनशील द्वन्द्वलाई जीवित बनाएका छन्।
‘ऊनको स्वीटर’ आर्टमाण्डू प्रा.लि.को ब्यानरमा बनेको पहिलो फिचर चलचित्र हो। यसमा निर्देशक चौहानकै लेखन छ, र सह लेखन सुरज कटुवालको छ। चलचित्रका गीत र संगीत सुजन चापागाईँले दिएका छन्।
यस चलचित्रको प्रदर्शन आगामी वैशाख २६ गते तय गरिएको छ, र यसको टिजरले दर्शकहरूलाई नयाँ प्रकारको नेपाली चलचित्र अनुभव गर्नको लागि उत्साहित बनाएको छ।
