काठमाडौ। पुराना डायरीका पानामा लेखिएका प्रेमका शब्द, टाँसिएका सम्झनाका तस्बिरहरू, अनि भावनाका हरफहरू अब डिजिटल स्क्रिनमा सीमित हुन थालेका छन्। तर ‘ऊनको स्वीटर’ चलचित्रले यही हराउँदै गएको आत्मीयतालाई पुनः उजागर गर्ने प्रयास गरेको छ।
मङ्गलबार सार्वजनिक भएको टिजरले डायरीका पुराना पानाहरू पल्टाउँदा आउने भावनात्मक सुवासलाई ताजा बनाएको छ। प्रेम, स्मृति र सम्बन्धका आरोह-अवरोहलाई टिजरले कलात्मक रूपमा प्रस्तुत गरेको छ।
चलचित्रमा विपिन कार्की र मिरूना मगर मुख्य भूमिकामा छन्। त्यस्तै, विल्सन विक्रम राई, एलेक्स पारस, र परीक्षा लिम्बु पनि प्रमुख भूमिकामा छन्। टिजरमा विपिन र मिरूनाको अभिनयले प्रेम र स्मृतिका गहिराइहरू चित्रण गर्छ भने, एलेक्स र परीक्षाले सम्बन्धमा आउने भावनात्मक उतार-चढावलाई जीवन्त बनाएका छन्। विल्सन विक्रम राईको भूमिका थप रोचक बनेको छ।
टिजरमा मिरूनाले विपिनलाई डायरी दिएकी छन्, जहाँ विपिन आफ्ना भावना लेख्दै छन्। प्रेमलाई साङ्केतिक रूपमा प्रस्तुत गरिएको छ, भने मिरूनाले सम्बन्धका जटिलता झल्काएकी छन्।
‘ऊनको स्वीटर’ आर्टमाण्डू प्रा.लि.को पहिलो फिचर चलचित्र हो। सुजन चापागाईँको सङ्गीत रहेको यो चलचित्र नवीन चौहानको लेखन तथा निर्देशनमा बनेको हो भने सुरज कटुवाल सह-लेखक रहेका छन्। चलचित्रमा सुनिल पोखरेल, माओत्से गुरुङ, प्रेम सुब्बा, सुरज तमू, र भावना खपाङ्गी मगरको पनि अभिनय रहेको छ।
