काठमाडौँ । गत शुक्रबारदेखि प्रदर्शनमा आएको ऋषिराज आचार्य निर्देशित चलचित्र ‘द्रौपदी’ ले दर्शकबाट सकारात्मक प्रतिक्रिया पाईरहेको छ । चलचित्र हेरेपछि उप सभामुख इन्दिरा रानाले ‘द्रौपदी’ ले नारी सशक्तीकरणको विषयलाई राम्रोसँग उठाएको बताइन् । ‘संस्कार, परम्पराहरू समयअनुसार परिवर्तन हुँदै जान्छन् । द्रौपदीले नारीहरूलाई कुरीति, कुसंस्कारविरुद्ध लड्न बल पुर्याएको छ,’ उनले भनिन्, ‘एक पटक सबैले हेर्नुपर्ने फिल्म बनेको छ ।’
चलचित्र केही दिन अघि पूर्वमन्त्री रेखा शर्माले हेरेकी थिइन् । उनले व्यवस्था परिवर्तन हुने तर अवस्था परिवर्तन नभएकाले ‘द्रौपदी’ ले नारीलाई माथि उठाउन र समाज परिवर्तनका लागि विद्रोहको बिगुल फुकेको धारण राखेकी थिइन् ।
चलचित्रमा कर्णालीको सुन्दरता, त्यहाँको जनजीवन र व्यथालाई अन्त्य नै मिहिनेतका साथ प्रस्तुत गरिएको छ । आश्विनी शाही, रवि ओड, कविराज भाम, जेल्सन अधिकारी, सुजाता तिमल्सिना, विष्णु ठडराई, प्रकाश ज्ञवालीलगायतको अभिनय छ ।
आरबी मुभिजको ब्यानरमा निर्माण भएको फिल्मका सह निर्माता ऋतु आचार्य र ठडराई हुन् भने निर्माता ऋषिराज आचार्य र प्रकाश ज्ञवाली हुन् । चलचित्र नेपाल रिलिज पछि युरोप, अमेरिका तथा अन्य विभिन्न देशहरुमा रिलिज हुने निर्देशक ऋषिराज आचार्यले जानकारी दिए ।
