काठमाडौं । माघे संक्रान्तिको अवसर पारेर चलचित्र ‘महाराजधिराज’को फष्टलुक पोष्टर सार्वजनिक गरिएको छ । छत्रेश्वरी म्यानेजमेन्ट प्रालिको प्रस्तुति रहेको फस्टलुकमा पोष्टरमा चलचित्रका प्रमुख पात्र पल शाहलाई दुई फरक अवतारमा देखाइएको छ । यस चलचित्रको स्लोगन ‘अनेकौं समस्या म देख्छु जगत्तमा, छ कि दोष हाम्रो आफ्नै रगतमा’ राखिएको छ ।
पोस्टरमा दुई कलाकार देखिएका छन् । एकजना राजर्षी पहिरनमा रहेको देखिन्छन् भने अर्को व्यक्ति नग्न अवस्थामा प्रस्तुत गरिएको छ । पोष्टरमा पललाई राजा र नग्न रूपमा देखाइएको छ । निर्माण पक्षले फष्टलुक पोष्टर सार्वजनिक गरेसँगै बाँकी सामग्री ट्रेलरमा आउने बताएको छ । परिच्छेद सेनले निर्देशन गर्ने चलचित्रको कथा पनि उनले नै लेखेका हुन् ।
‘महाराजधिराज’का प्रस्तुतकर्ता विराज विष्ट हुन् । बिराजले यसअघि चलचित्र ‘बुलाकी’ निर्माण गरेका थिए भने निर्देशक सेनले ‘प्रेमगञ्ज’ निर्देशन गरेका थिए । चलचित्रको निर्मातामा टोपेन्द्र विष्ट, चक्रबहादुर केसी र रवि खड्का रहेका छन् । चलचित्र दशैँको फूलपातीमा आउने निर्माण टिमले बताएको छ ।
