काठमाडौं । आगामी फागुनको १४ गते महाशिवरात्रीको अवसर पारेर प्रदर्शनमा आउने सिनेमा ‘मायावी’को दुई नयाँ पोस्टर सार्वजनिक गरिएको छ । निर्माणपक्षले सिनेमाको एउटा गीत सार्वजनिक गरेपछि दुई नयाँ पोस्टर सार्वजनिक गरेको हो । सार्वजनिक पोस्टरमा अभिनेता पल शाह र अभिनेत्री दीपिका प्रसाईलाई स्थान दिइएको छ ।
एक पोस्टरमा पल दीपिकासँग रोमान्टिक देखिएका छन् भने अर्को पोस्टरमा पल भावुक देखिएका छन् । दुई पोस्टरबाट सिनेमाले प्रेम र पीडाको भाव व्यक्त गर्ने बुझ्न सकिन्छ । सिनेमामा पल र दीपिकासँगै सुशिल सिटौला, करिश्मा श्रेष्ठ, डेव्यु अभिनेता समीम खान, राजाराम पौडेल, प्रशान्त ताम्राकार, लक्ष्मी गिरी, अंशु महर्जन, रवि डंगोल, रमा प्रसाई, दीपेन्द्र सिम्खडा, संगीता सिलवाल लगायतका कलाकारहरुको पनि अभिनय छ ।
दिवाकर भट्टराइको लेखन तथा निर्देशनमा निर्माण भएको सिनेमामा क्रियटिम सिने आर्ट्स र नेम महर्जनको लगानी छ । सिनेमामा ध्रुव न्यौपाने, राज कटुवाल र चन्द्र पन्त निर्माता तथा राजु पराजुली र सुमित वली सह-निर्माता अनि प्रविन भट्टराई र करण सिंह कार्यकारी निर्माताको रुपमा रहेका छन् ।
सिनेमामा मिलन श्रेष्ठको सम्पादन, बसन्त अधिकारीको सह-निर्देशन, शम्भुजित बास्कोटा र एसडी योगीको संगीत, कविराज गहतराज र प्रविण सिंहको कोरियोग्राफी छ । सिनेमाको पोस्टर डिजाइन राकेश दाहाल र पोस्टरका लागि फोटोसुट विकास खतिवडाले गरेका हुन् । सिनेमा ‘मायावी’ले प्रेम, विछोड र मित्रताको कथा भन्छ ।
