कुनै समय सलमान खान र कट्रिनाकैफको प्रेमप्रसंगले सिंगो बलिउड तताएको थियो। समयको क्रमसँगै कट्रिना रणवीर कपुरसँग नजिकिएपछि सलमान आफ्नै बाटो लागे। एकपछि अर्को गर्दै बलिउडमा राज गरिरहेका सलमान हलिउड चलचित्र निर्माणतिर पनि लागेका छन्।
सलमान खान्स विइङ ह्युमन प्रोडक्सनको सहनिर्माण रहेको हलिउड चलचित्र ‘डा. क्यावी’बाट कट्रिनाकी बहिनी इसाबेले कैफले डेब्यु गरेपछि सलमान चर्चामा आएका छन्। ‘बलिउड ब्याड ब्वाइ’का रूपमा चिनिने सलमानको चलचित्रमा इसाबेलेको अभिनयलाई लिएर बलिउडमा अनेक चर्चा चल्न थालेको छ। स्रोतका अनुसार क्यानेडियन निर्देशक जिन फ्रानकोइस पाउलियटको निर्देशन रहेको यस चलचित्रको गतसातादेखि क्यानडाको टोरन्टोबाट छायांकन सुरु भएको छ।
सलमानको साथमा करिअर सुरु गरेका अभिनेत्रीले बलिउडमा राम्रो स्थान बनाएका छन्। बेलायतमा ट्याक्सी चलाउने एकजना बेरोजगार भारतीय चिकित्सकको कथा समेटिएको चलचित्र ‘डा. क्यावी’मा इसाबेले सहअभिनेत्रीका रूपमा काम गरि रहेको बताइएको छ। उनका साथै भिनय भिरमनी, एड्रिने पलिक्की, कुनाल नायरले चलचित्रमा मुख्य भूमिका निर्वाह गरेका छन्।
