काठमाडौँ। सिम्पल आर्ट्सले कलाकार सरिता लामिछानेलाई ‘सिम्पल आर्ट्स सम्मान २०८०’ प्रदान गर्ने भएकाे छ। सिम्पल आर्ट्सका संस्थापक अध्यक्ष संगीतकार तथा निर्देशक केशव सान्दाइको अध्यक्षतामा बसेको बैठकले साे निर्णय गरेकाे हाे।
यसै गरी साहित्यकार मधुसूदनप्रसाद घिमिरे, निर्माता तथा वितरक सरोज शर्मा, गायक तथा सङ्गीतकार सूर्य दयालु र शिक्षासेवी केदारप्रसाद तिमल्सिनालाई पनि सिम्पल सम्मान २०८० प्रदान गर्ने निर्णय गरेको छ।
सिम्पल आर्ट्सले हरेक वर्ष साहित्य, सङ्गीत, कला र सामाजिक क्षेत्रका पाँच प्रतिभालाई सिम्पल सम्मान प्रदान गर्दै आएको छ। यसै क्रममा याे सिम्पल सम्मान छब्बीसौ शृङखला रहेकाे छ।
सिम्पल आर्ट्सका संस्थापक तथा पूर्व अध्यक्ष कथाकार विमल कोइरालाकाे अनुसार साहित्यकार तथा कलाकार विक्रम श्रेष्ठ सागर संयोजक, कलाकार करुणा पोखरेल र कलाकार जमुना पोखरेल कोइराला सदस्य रहेको प्रतिभा चयन समितिले सिफारिस गरेको नामलाई बैठकले अनुमोदन गरेको बताइएको छ।
सम्मान आगामी फागुन १२ गते शनिबार एक कार्यक्रम बीच समर्पण गरिंदैछ। २०५५ सालमा विमल, केशव,निबन्ध (विकेनि)ले स्थापना गरेको सिम्पल आर्ट्सलाई उनीहरू तीन जनाको मित्रताको प्रतीकको रूपमा लिने गरिएकाे छ।
