काठमाडौँ । चलचित्र ‘दान्भी’को छायांकन सुरु भएको छ। निर्माण युनिटले काठमाडौँको नैकापमा सेट बनाएर एक्सनको दृश्यबाट चलचित्रको छायांकन सुरु गरेको हो । क्लाइमेक्समा रहने एक्सनका दृश्य अभिनेत्री पूजा शर्माले अभिनय गरिरहेकी छन् । पूजाको एक्सनको दृश्यबाट फिल्मको छायांकन सुरु भएको निर्देशक रुपेश तामाङले जानकारी दिए ।
चलचित्रमा श्री श्रेष्ठले एक्सन दृश्यको निर्देशन गरिरहेका छन् । हरि लामा घलेको छायांकन रहेको चलचित्रमा कथा रविना थापा मगरको छ भने पटकथा तथा संवाद संजोग रानाको छ । चलचित्रमा अर्जुन पोखरेलेको संगीत, कविराज गहतराजको कोरियोग्राफी छ । अनुप गदाल र देव मगरको लगानीमा तयार हुने चलचित्रमा कमला लिम्बु र गोकुल सुवेदी सह–निर्माताको रुपमा छन् ।
चलचित्र ‘दान्भी’को क्लाइमेक्समा सय जना फाइटर प्रयोग गरिएको निर्देशक तामाङले जानकारी दिए । उनले भने–‘फिल्मको क्लाइमेक्सका लागि हामीले निकै मिहिनेत गरिरहेका छौ । दर्शकले साउथ र बलिउड चलचित्रमा देख्दै आउनुभएको उच्च तहको एक्सन नेपाली चलचित्रमा पनि अब देख्न पाउनुहुनेछ ।’
चलचित्रको क्लाइमेक्सका लागि ३ दिनदेखि काम गरिरहेकी अभिनेत्री पूजा शर्माले भनिन्, ‘फिल्मको मेकरले एक्सनका लागि कुनै कसर बाँकी राख्नु भएको छैन । मैले पनि आफूले सकेको मिहिनेत गरिरहेको छु । आशा छ, दर्शकले नेपाली चलचित्रमा एक्सनको नयाँ प्रयोग हेर्न पाउनुहुनेछ ।’ पूजाले एक्सनमा काम गर्न सजिलो नभएको समेत तर्क गरिन् ।
चलचित्र ‘दान्भी’को प्रदर्शन मिति तय गरिएको छैन । तर, यो चलचित्र आम दर्शकका लागि प्रतीक्षित बनिसकेको छ । चलचित्रमा पूजाको अलवा नायक कुन्साङ बोमजोमले अभिनय रहनेछ ।
