काठमाडौं । नेपाली नयाँ वर्षमा नेपाली फिल्महरुबीच रोचक प्रतिस्पर्धा हुने देखिएको छ । २०८० सालको बैशाख १ गतेका लागि पाँच फिल्मले प्रदर्शन मिति घोषणा गरिसकेको अवस्थामा अर्को फिल्म पनि थपिएको छ ।
चलचित्र ‘बुलाकी’ पनि बैशाख १ गतेबाट प्रदर्शनमा आउने भएको हो । निर्माण टिमले आइतबार एक पोस्टर सार्वजनिक गर्दै फिल्म बैशाख १ गतेबाट प्रदर्शनमा आउने घोषणा गरेको हो ।
यसअघि यो फिल्मले फागुन १९ का लागि प्रदर्शन मिति घोषणा गरेको थियो । तर, यो मितिमा दुई ठूला फिल्म ‘छक्का पञ्जा ४’ र ‘छड्के २’ आउने भएपछि ‘बुलाकी’ डेढ महिना पछाडि गरेको हो ।
लक्ष्मण सुनारको निर्देशनमा बनेको ‘बुलाकी’मा सुरक्षा पन्त, नरेन खड्का, विराज विष्ट लगायतको अभिनय छ ।
टोपेन्द्र बिष्टको निर्माता, स्वं. मोति बिष्ट प्रस्तुतकर्ता रहेको फिल्मको छायांकन विकट क्षेत्र डोल्पा, जाजरकोट र रुकुमका विभिन्न स्थानमा भएको हो । छत्रेश्वरी म्यानेजमेन्टको ब्यानरमा फिल्म निर्माण भएको हो ।
बैशाख १ गतेका लागि यसअघि ‘भगवत् गीता’, ‘नाईं नभन्नू ल ६’, ‘प्रसाद २’, ‘जारी’ र ‘बिहे पास’ले प्रदर्शन मिति घोषणा गरिसकेका छन् ।
