दयाहाङ र सौगातको चलचित्र ‘दुई नम्बरी’ प्रदर्शनमा


काठमाडौं । अभिनेताद्वय दयाहाङ राई र सौगात मल्लको मुख्य भूमिका रहेको चलचित्र ‘दुई नम्बरी’ आज शुक्रवारबाट देशभर प्रदर्शनमा आएको छ । चलचित्रले मल्टिप्लेक्समा उच्च शोज पाएको छ। देशकै ठुलो मल्टिप्लेक्स चेन क्युएफएक्स लगायत अन्य सबै जसो मल्टीप्लेक्समा चलचित्रको शोज राम्रो छ।

‘छ माया छपक्कै’ फ्रेम्ड निर्देशक दीपेन्द्र लामाको लेखन तथा निर्देशनमा तयार भएको ‘दुई नम्बरी’मा दयाहाङ र सौगातका साथै अभिनेत्री उपासना सिंह ठकुरी, भुटानी अभिनेत्री उगेन छोदेन, अभिनेता बुद्धि तामाङ मुख्य भूमिकामा छन् ।

दुई साथीको मित्रताको कथामा कमेडी जनरामा यो चलचित्र निर्माण भएको हो । सार्वजनिक ट्रेलरमा दयाहाङ र सौगातको मित्रतालाई देखाइएको छ । चलचित्रमा सौगातको जोडी उपासनासँग बाँधिएको छ भने दयाहाङको जोडीका रूपमा उगेन छिन् । उनीहरूबीचको प्रेमलाई समेत ट्रेलरमा चित्रण गरिएको छ ।

किरण नेपाली प्रस्तुतकर्ता रहेको चलचित्रमा सरोज नेपाली कार्यकारी निर्माता छन् । मिठु तामाङ्नी सह–निर्माताको रूपमा रहेको चलचित्रको निर्माता दीपक मनाङ्गे, अमलादेवी राई र जयश श्रेष्ठ हुन् । दशैंको टीकाको दुई दिनपछि प्रदर्शनमा आउने चलचित्रलाई सुशन प्रजापतिले छायाँकन एवं निमेश श्रेष्ठले सम्पादन गरेका हुन् । चलचित्रको वितरणको जिम्मा आर आर फिल्म्सले लिएको छ।