जाँच समितिका सदस्य सन्तोषले गरे चलचित्र सेन्सर बहिष्कार


काठमाडौं । चलचित्रको सेन्सरमा राजनीति भएको भन्दै चलचित्र जाँच समितिका सदस्यले नै सेन्सर प्रक्रियालाई बहिष्कार गरेका छन् । सेन्सरमा विदेशी चलचित्रलाई प्राथमिकतामा राखिएको र नेपाली चलचित्रलाई विभेद गरिएको भन्दै सदस्य सन्तोषकुमार थापाले बहिष्कारको निर्णय गरेका हुन् । ‘चलचित्र सेन्सरको एक दिनअघि नै सेन्सरको सूचना आउनुपर्ने हो, तर आजको आजै सेन्सरमा आऊ भन्नु उचित होइन’ । थापाले सेलिब्रेटी नेपालसँग भने ।

विदेशी फिल्मलाई मनपरी ढंगले जुनसुकै समयमा पनि सेन्सर गर्ने र सेन्सरको कारण देखाउँदै नेपाली फिल्मको बुकिङ नखोल्ने निर्णय चित्त नबुझेकाले बहिष्कार गर्ने निर्णय गरेको थापाले बताए ।

बिहीबार मात्रै बलिउड फिल्म ब्रह्मास्त्रसहित दुई नेपाली फिल्मको सेन्सर तालिका रहेको थियो । तिनै चलचित्रको सेन्सर भई सकेको छ भने शुक्रबार बिहान दक्षिण भारतीय फिल्म ‘सीतारामम’को सेन्सर तालिका छ । शुक्रवार सार्वजनिक विदा पनि परेको छ। अरु बेला सार्वजनिक बिदाको दिन सेन्सर हुने गरेको छैन। यो पटक बिदाको दिन पनि सेन्सर रखिएको छ।