निर्माता संघ र निर्देशक समाजको संघर्षमा उत्रने चेतावनी,’नेपाली चलचित्रमाथि विभेद भयो’


काठमाडौं । विदेशी चलचित्रको सेन्सरमा ढिलाइ भएको कारण देखाउँदै नेपाली चलचित्रको बुकिङ खुला नगरिएकोप्रति चलचित्र क्षेत्रका दुई संस्थाले गम्भीर आपत्ति जनाएका छन् । चलचित्र निर्माता संघ र चलचित्र निर्देशक समाजले छुट्टाछुट्टै विज्ञप्ति जारी गर्दै नेपाली चलचित्रलाई पेल्न र हेप्न खोजिएको भन्दै खेद व्यक्त गरेका छन् ।

निर्माता संघले शुक्रबारदेखि प्रदर्शनमा आउने नेपाली चलचित्र ‘ऐना झ्यालको पुतली’ लाई समान हैसियतको शो र अग्रिम बुकिङ खुला गर्ने वातावरण बनाइदिन आग्रह गरेको छ । ‘अन्यथा नेपाली चलचित्रप्रति देखाउनुभएको निन्दनीय व्यवहारका विरुद्ध बाध्य भई कडा रुपमा प्रस्तुत भएर निरन्तर संघर्षमा उत्रिनेछौं,’ निर्माता संघले भनेको छ । निर्माता संघका अध्यक्ष नवल खड्काको हस्ताक्षरित बिज्ञप्ति सार्वजनिक गरिएको छ।

निर्देशक समाजले पनि टिकट बुकिङ खुल्ला गर्न ढिलाइ गरेकोप्रति खेद व्यक्त गरेको छ । नेपाली फिल्म क्षेत्रलाई हतोत्साही तुल्याउने गैरजिम्मेवारीपूर्ण कार्यलाई बन्देज लगाउन पनि आग्रह गरेको छ । निर्देशक समाजका महासचिव जनकदीप पराजुलीको हस्ताक्षरमा प्रकाशित बिज्ञप्तिमा संधैभरी नेपाली चलचित्र माथी बिदेशी फिल्महरुले दबाबमा राख्ने यस्तो प्रवृतिको घोर भत्सर्ना गर्ने उल्लेख छ।