काठमाडौं। सुदर्शन थापा निर्देशित चलचित्र ‘सम्हालिन्छ कहिले मन’को ट्रेलर सार्वजनिक गरिएको छ । चलचित्रको सार्वजनिक गीत ‘जरुरी कुरा छ’ले राम्रो हाइप बनाएपछि निर्माण टिमले चलचित्रको ट्रेलर सार्वजनिक गरेको हो ।
३ मिनेट आसपासको चलचित्रको ट्रेलर मुख्य तीन पात्र पुजा, आकाश र सोनमबीचको प्रेम सम्बन्धकको वरिपरि घुम्छ । लभस्टोरी चलचित्र निर्माण तथा निर्देशनमा माहिर सुदर्शन थापाको यो अर्को सुन्दर लभ स्टोरी बनेको अनुमान गर्न सकिन्छ ।
भदौ १७ गतेबाट प्रदर्शन हुन लागेको चलचित्रमा पूजा शर्मा, आकाश श्रेष्ठ, सोनम तोप्देन, गौरी मल्ल, सरोज खनाल, धिरेन शाक्य लगायतका कलाकारको अभिनय छ । गायक समेत रहेका सोनमले यही चलचित्रबाट अभिनेताको रुपमा डेब्यू गर्दैछन् ।
एबी इन्टरनेशनलको ब्यानरमा निर्मित चलचित्रको कथा महेश दवाडीले लेखेका हुन् । अर्जुन पोखरेल, ताराप्रकाश लिम्बु र जेम्स प्रधानको संगीत, अर्जुन जिसीको सम्पादन रहेको चलचित्रको निर्मातामा अमित बस्नेत, परी राना र अजित कुमार थापा छन् ।
