काठमाडौं । बि.एस. बलामी निर्देशित फिल्म ‘प्रपञ्च’को गीत रिलिज गरिएको छ । सोमबार राजधानीमा एक कार्यक्रमको आयोजना गर्दै फिल्ममा समावेश ‘मुटुमा सास भर्ने आधार’बोलको गीत रिलिज गरिएको हो ।
गीतको भिडियोमा फिल्मका मुख्य कलाकारहरु सुमन थापा र मेनुका माझीलाई रोमान्टिक अवतारमा प्रस्तुत गरिएको छ । फिल्मको गीत डिएआर मुभिजबाट सार्वजनिक गरिएको हो ।
शंकरलाल श्रेष्ठ र श्रद्धा दयालीको स्वर रहेको ‘मुटुमा सास भर्ने आधार’लाई दिनेश सुवेदीले लेखेका हुन् । सन्तोष प्रगाढको संगीत रहेको गीतको भिडियोमा तेञ्जु योन्जनको कोरियोग्राफी हेर्न सकिन्छ । दशैंको टिकाको दुई दिनपछि अर्थात असोज २१ गतेदेखि प्रदर्शनमा आउने फिल्म ‘प्रपञ्च’लाई बद्री साह, अनिल गुप्ता र रवीराज आचार्यले निर्माण गरेका हुन् । शिवानी बलामी कार्यकारी निर्माता रहेको फिल्ममा सिद्धार्थ सिंह, ध्रुव कोइराला, पियुस मगर, मनिल तामाङ, प्रकृति केसी, जोश्ना सिंखडा, सिजन तिवारी लगायतका कलाकारहरुको पनि अभिनय छ ।
प्रकाश कुवँरको कथा रहेको फिल्ममा दिवस गुरुङको डिओपी, देव मर्हजनको द्धन्द्व निर्देशन, प्रविन ढकालकोे सम्पादन छ । गीत सार्वजनिक कार्यक्रममा निर्माण टिमले फरक खालको फिल्म निर्माण गरेको बताउँदै दर्शकले रुचाउनेमा विश्वास व्यक्त गरे ।
