(सेलिब्रेटी नेपाल) ११ असार-दुई सातादेखि गम्भीर अस्वस्थ भई अस्पतालमा भर्ना हुनु भएका जनकविकेशरी धर्मराज थापा आइतबार वीर अस्पतालबाट डिस्चार्ज हुनु भएको छ। अचानक मस्तिष्क पक्षघात भई थापालाई अस्पताल भर्ना गरिएको थियो।
पोखराको बाटुलेचौरस्थित पुख्र्यौली घरमा एक्कासि बिरामी भएपछि उनलाई मणिपाल अस्पतालमा भर्ना गरिएको थियो। उक्त अस्पतालबाट थप उपचारका लागि गत हप्ता वीर अस्पताल ल्याइएको थियो। स्वास्थ्यमा क्रमिक सुधार आएकाले डाक्टरको सल्लाहअनुसार घर फर्काइएको उनका जेठा छोरा एवम् धर्मराज–सावित्री थापा गुठीका अध्यक्ष मदनराज थापाले जानकारी गराए। डिस्चार्ज हुनुअघि थापालाई पर्यटन तथा नागरिक उड्डयन र संस्कृति मन्त्री रामकुमार श्रेष्ठले अस्पताल पुगेर भेटेका थिए।
