काठमाडौं । लेखक तथा अभिनेता खगेन्द्र लामिछानेको डेब्यू निर्देशन रहेको चलचित्र ‘पानीफोटो’को टिजर सार्वजनिक गरिएको छ । बिहीबार सार्वजनिक टिजरमा हराएको छोरा खोज्न हिँडेका एक दम्पतिको पीडा देखाईएको छ ।
सशस्त्र द्वन्द्वमा बेपत्ता छोरा खोज्ने यात्रामा निस्किएका दम्पतीको कथा पेश गर्ने ‘पानीफोटो’ साउन १३ गतेदेखि देशव्यापी प्रदर्शनमा आउँदैछ । सार्वजनिक टिजरमा अनुप बराल, मेनुका प्रधान, मलिका महत, खगेन्द्र लामिछाने अटाएका छन् । अनुप र मेनुकाको जीवन्त अभिनय र गेटअपले दर्शकको ध्यान तान्छ ।
चलचित्रमा प्रकाश घिमिरे, माओत्से गुरुङ, बुद्धि तामाङ, रमेश अधिकारी, कमलमणी नेपाल, अनुज पाण्डे, राधा श्रेष्ठ, श्यामकुमार खड्का लगायतका कलाकारहरुको समेत अभिनय छ ।
‘पशुपति प्रसाद’ र ‘धनपती’ जस्ता नेपाली मौलिक स्वादका चलचित्रहरुको निर्माण गरेको टुकी आर्टस् प्रा.लिले मञ्जुश्री फिल्मस् प्रोडक्सनसँगको सहकार्यमा ‘पानीफोटो’ निर्माण गरेको हो । चलचित्रको निर्माता रोजिना सिटौला र रबिन्द्र बज्राचार्य हुन् । दीपक बज्राचार्यको छायाँकन रहेको चलचित्रलाई निमेष श्रेष्ठले सम्पादन गरेका हुन् । करीब डेढ दशकअघि ‘पानीफोटो’ नाटक मञ्चन भएको थियो । त्यही नाटकलाई खगेन्द्रले चलचित्रको स्वरुपमा ढालेका हुन् ।
