काठमाडौं । एभरेष्ट सुर्य बोहरा निर्देशित चलचित्र ‘हेल्लो जिन्दगी’को पहिलो गीत सार्वजनिक गरिएको छ । ‘कता कता’बोलको गीतमा चलचित्रका मुख्य कलाकार बिक्रम जोशी र दीपिका प्रसाईलाई फिचर्ड गरिएको छ । गीतको भिडियो बेलायतका रमणीय स्थानमा खिचिएको छ ।
निर्देशक बोहराकै शब्द रचना रहेको गीतमा प्रताप दास र प्रविशा अधिकारीको स्वर छ । सार्वजनिक गीतको संगीत एलिस कार्कीले तयार पारेका हुन् । विष्णु देवाको कोरियोग्राफी तथा सम्पादन रहेको गीतको भिडियो मेकिङ उच्च देखिन्छ । गीतको भिडियो अरुण प्रसाद अलवर्टले खिचेका हुन् ।
वीरञ्जना इन्टरटेनमेन्टको प्रस्तुतीमा महारानी इन्टरटेनमेन्ट युके र एभरेष्ट सुर्य बोहरा फिल्मस्को ब्यानरमा निर्माण भएको सिनेमामा विक्रम डी जोशी र दीपिका प्रसाईको मुख्य भुमिका छ । चलचित्रमा प्रियंका कार्की, विक्रान्त वस्नेत विल्सन विक्रम राई, एभरेष्ट सूर्य बोहरा, सविता गुरुङ, सनमकुमार बैराग, जानकी पन्त, ध्रुव दत्त, कुमुद पन्त लगायतका कलाकारको पनि अभिनय रहेको छ ।
हिराल जोशी र विक्रम जोशीले निर्माण गरेको चलचित्रकी कार्यकारी निर्मातामा सिर्जना जोशी महर्जन हुन् । निर्देशक बोहरा र अभिनेता जोशीको कथा रहेको सिनेमाको पटकथा र संवाद लेखनमा निर्देशक बोहरालाई अभिमन्यू निरवीले सघाएका छन् । पुरुषोत्तम प्रधानको छायांकन रहेको चलचित्रमा मित्र डी गुरुङको सम्पादन छ ।
सविता गुरुङ सह-निर्माता रहेको सामाजिक कथामा निर्माण गरिएको ‘हेल्लो जिन्दगी’को बेलायत र नेपालमा छायांकन गरिएको हो । सिनेमाका गीतमा राजनराज सिवाकोटीको संगीत छ । चलचित्र चैत्र ११ बाट सार्वजनिक प्रदर्शनमा आउने छ।
