एजेन्सी। बलिउड अभिनेत्री आलिया भट्टले सन् २०१३ मा करण जोहारको फिल्म ‘स्टुडेण्ट अफ द इयर’बाट फिल्म उद्योगमा धमाकेदार पाइला चालिन् । यो फिल्मको सफलतापछि उनले एकपछि अर्को ठूलो फिल्ममा अभिनय गरिरहेकी छन् ।
हालका दिनमा आलिया फिल्मबाहेक रणवीर कपूरसँगको अफेयरका कारण पनि चर्चामा छिन् । आलियाले आफ्नो करियरमा कैयौं ठूला स्टारसँग अभिनय गरिसकिन् । तर सायद कमैलाई मात्र थाहा होला कि आलिया अभिनेता अक्षय कुमारको ठूलो फ्यान हुन् ।
अक्षय र आलियाले एकसाथ हालसम्म कुनै फिल्ममा अभिनय गरेका छैनन् । तर आलिया अक्षयको जीवनबाट निकै प्रभावित छिन् । केही वर्ष अघि उनलाई एक अन्तरवार्तामा ‘बिहान उठ्दा तपाईं कोही पुरुष अभिनेता बन्नुभयो भने को बन्न चाहनुहुन्छ’ भनी सोधिएको थियो ।
जसको जवाफ उनले अक्षय कुमार भनेर दिएकी थिइन् । आलियाले अक्षय चाँडै उठ्ने र चाँडै सुत्ने बानी भएको अभिनेता भएकाले उनको जीवन आफूलाई सानदार लाग्ने बताएकी थिइन् ।
कामको कुरा गर्दा आलिया फिल्म ‘आरआरआर’मा अजय देवगनका साथ देखिँदैछिन् । उनि अभिनित सञ्जय लीला भन्सालीको फिल्म ‘गंगुबाई काठियावाडी’ प्रदर्शनको क्रममा रहेको छ ।
