सेलिब्रेटी नेपाल काठमाडौँ
साउन १८ गतेबाट देशैभर प्रदर्शनमा आउन लागेको कमेडी जनरामा निर्मित अभिनेता अनुप विक्रम शाही स्टारर चलचित्र ‘झमक बहादुर’ को ट्रेलर सार्वजनिक भएको छ । पैसा र सुनका लागि पात्रहरुको बीचको तनाव र द्वन्द्वलाई ट्रेलरमा देखाइएको छ । पहिलो ट्रेलर सार्वजनिक हुँदा यो चलचित्र दक्षिण भारतीय चलचित्र ‘मुम्बई एक्सप्रेस’ को फोटोकपी भन्दै चर्को आलोचना भएको थियो । यो चलचित्रमा अभिनेता शाहीले कान नसुन्ने युवकको भूमिका निर्वाह गरेका छन् ।
निर्देशक भोमन कटुवालले ‘झमक बहादुर’, ‘मुम्बई एक्सप्रेस’ को फोटोकपी नरहेको बताउँदै नितान्त नेपाली परिवेश सुहाउँदो चलचित्र रहेको बताएका छन् । सुन तस्करी, लुटपाट र अपहरणलाई चलचित्रको मुख्य विषय बनाइएको छ । अनुप विक्रम शाही, यादब देपकोटा (सरापे), राजु कमेडी, मिन कुमार तामाङ, कल्याण अधिकारी, सुजाता थापालगायतका कलाकारहरुको अभिनय रहेको चलचित्रमा ओम सुनारको संगीत छ ।
राजु किरात राईको द्वन्द्व रहेको चलचित्रलाई मिनकुमार तामाङले निर्माण गरेका हुन् । सह-निर्माता कोपिला कुमारी डल्लाकोटी रहेकी छन् । यसमा पवन गौतमको छायांकन छ ।
