सेलिब्रेटी नेपाल काठमाडौँ
नक्कली प्रचण्डको नामले परिचित हास्यकलाकार प्रदीप पाठकको निर्माणमा बनेको चलचित्र ‘१२ मासे’ को सम्पादन सकिएर हाल डबिङको कार्य भई रहेको छ । स्टेज तथा सिरियलमा प्रचण्डको हुबहु स्वर निकालेर दर्शकलाई मनोरञ्जन दिन सफल प्रदीपको यो पहिलो चलचित्र निर्माणको प्रयास हो । ५० लाखको बजेटमा तयार यो चलचित्र सुटिङ गर्न झण्डै १ महिना लाग्यो । काठमाडौं, भक्तपुर, काभ्रे र सिन्धुलीमा यो चलचित्र छायांकन गरिएको हो ।
सिरियल निर्देशनमा अब्बल लय सङ्ग्रौलाले यो चलचित्रको निर्देशन गरेका हुन् । आमा पार्वती देवी फिल्मस् प्रोडक्शन प्रस्तुत कमेडी जनराको चलचित्र ‘१२ मासे’ मा जयकिशन बस्नेत, पुजना प्रधान, पुरन थापा, मरिचमान श्रेष्ठ ‘बल्छी धुर्बे’, प्रदीप पाठक लगायत कलाकारको मुख्य भूमिका रहेको छ । चलचित्र आगामी २०७५ सालको जेष्ठ ११ गते रिलिजमा आउने प्रदीपले जानकारी दिए ।
