सेलिब्रेटी नेपाल काठमाडौँ
झरना थापाको डेब्यु निर्देशनको चलचित्र ‘ए मेरो हजुर २’आजदेखि देशभरका हलमा प्रदर्शनमा आएको छ । ‘ए मेरो हजुर २’ सँग कुनै पनि नयाँ नेपाली चलचित्र नजुधाइएकाले निर्माण पक्षलाई चिठ्ठा परेको छ ।
धेरै वर्षअघि निर्माता सुनिलकुमार थापाले श्रीकृष्ण श्रेष्ठ र झरना थापालाई लिएर ‘ए मेरो हजुर’ चलचित्र बनाएका थिए । जुन चलचित्रको निर्देशन शिव रेग्मीले गरेका थिए । अहिले श्रीकृष्ण र शिव दुवै छैनन् । झरनाले ‘ए मेरो हजुर २’ दुवैमा समर्पित रहेको बताएकी छन् ।
‘ए मेरो हजुर २’ को बिहीबार साँझ प्रिमियर गरिएको थियो । झरना थापाको डेब्यु निर्देशकीय चलचित्र भएकाले पनि धेरै कलाकार र सञ्चारकर्मी ‘ए मेरो हजुर २’ हेर्न हलमा पुगेका थिए । चलचित्र हेरिसकेपछि सबैले निर्देशकको रूपमा झरना थापाको तारिफ गरेका छन्।
त्यसमा पनि नायिका साम्राज्ञराज्यलक्ष्मी शाह, सलिनमान बानिया र सलोन बस्नेतको अभिनयलाई सबैले मन पराएका छन् । चलचित्रका गीत पहिले नै हिट भइसकेका छन् । कलाकार र समीक्षकबाट प्रिमियरमा राम्रो तारिफ पाएपछि निर्माण पक्ष निकै उत्साहित भएको छ । त्रिकोणात्मक प्रेमकथामा आधारित चलचित्र भएकाले युवा पुस्ताका दर्शकमा यसको क्रेज धेरै देखिएको छ ।
