सेलिब्रेटी नेपाल । दशैँको अवसर पारेर आज शुक्रबारदेखि दुई नेपाली चलचित्र ‘आ बाट आमा २’ र ‘१२ गाउँ २’ प्रदर्शनमा आएका छन्। चन्द्र पन्तको निर्देशनमा बनेको ‘आ बाट आमा २’ र विराज भट्टको निर्देशनमा तयार भएको ‘१२ गाउँ २’ ले फरक–फरक कथावस्तु र प्रस्तुतिमार्फत दर्शकलाई आकर्षित गर्ने अपेक्षा गरिएको छ।
दुवै चलचित्रले दर्शकमाझ आ–आफ्नै किसिमको प्रभाव छाड्ने लक्ष्य राखेका छन्। ‘आ बाट आमा २’ भावनात्मक कथावस्तु र पारिवारिक सम्बन्धमा केन्द्रित छ भने ‘१२ गाउँ २’ मा एक्सन र मनोरञ्जनको स्वाद पाउन सकिन्छ। त्यसैले यसपटकको दशैँमा दर्शकको रोजाइ कुन चलचित्र बन्नेछ भन्ने चासो बढेको छ। विशेषगरी पल शाह र समीर भट्टमध्ये कसले बढी दर्शकलाई सिनेमाघरसम्म तान्न सफल हुन्छन् भन्ने विषयले पनि फिल्मी बजारमा चर्चा पाएको छ।
अत्यधिक भावनात्मक दृश्यका कारण केन्द्रीय चलचित्र जाँच समितिबाट ‘पीजी’ प्रमाणपत्र पाएको ‘आ बाट आमा २’ दशैँको बिदामा परिवारसहित चलचित्र हेर्न चाहने दर्शकको रोजाइमा पर्ने अपेक्षा गरिएको छ। चलचित्रमा विपना थापा, पल शाह, मलिका महत, स्वर्गीय प्रदीप रावत, साइग्रेस पोखरेल र नरेन खड्कालगायत कलाकारको अभिनय रहेको छ। भावनात्मक कथावस्तु र कलाकारको प्रस्तुतिलाई चलचित्रको प्रमुख आकर्षणका रूपमा हेरिएको छ।
त्यस्तै, एक्सनप्रधान चलचित्र ‘१२ गाउँ २’ मा विराज भट्ट, समीर भट्ट, अनुपविक्रम शाही, प्रकाश शाह, सुनील पोखरेल, कालु राना, खुसी कार्की र पुष्कर भट्टलगायत कलाकारको अभिनय रहेको छ। चलचित्रमा कृशु शाही (काफिया) र वर्षा इटनी पनि देखिनेछन्। विराज भट्टको निर्देशन रहेको चलचित्रको कथा तथा पटकथा सन्तोष सरकारको हो।
दशैँको लामो बिदा, कलाकारको लोकप्रियता, चलचित्रको विषयवस्तु र दर्शकको प्रतिक्रियाले दुवै चलचित्रको व्यापारमा प्रभाव पार्ने देखिन्छ। फरक स्वादका यी दुई चलचित्रमध्ये कुनले दर्शकको बढी साथ पाउँछ र बक्स अफिसमा कस्तो प्रदर्शन गर्छ भन्ने कुरा भने आगामी दिनको व्यापारिक नतिजाले स्पष्ट पार्नेछ।
दशैंको अवसरमा भोली बाट अर्को प्रतिक्षीत चलचित्र ‘छ माया छपक्कै २’ पनि प्रदर्शनमा आउंदै छ।
