काठमाडौँ । नवीन पन्तको लेखन तथा निर्देशनमा निर्माण हुन लागेको नयाँ नेपाली फिल्म ‘बाकस’ मा अभिनेता महेश त्रिपाठी मुख्य भूमिकामा देखिने भएका छन्। निर्माण पक्षले आइतबार त्रिपाठीलाई फिल्मका लागि औपचारिक रूपमा अनुबन्ध गरेको हो।
महेशको प्रवेशसँगै फिल्मको प्रमुख कलाकारको लाइनअप थप बलियो बनेको छ। यसअघि नै अभिनेत्री बिपना थापा र वर्षा राउत फिल्मका मुख्य भूमिकाका लागि अनुबन्ध भइसकेका छन्।
सुजिता चौलागाईंको निर्माणमा बन्ने फिल्ममा छत्र बहादुर खड्का सहनिर्माता तथा धर्मेन्द्र पन्त कार्यकारी निर्माता छन्। फिल्मको संगीतमा दीपक शर्मा र सनम पुरुष राईले सहकार्य गर्नेछन्। गीतका शब्द दीपक शर्मा र निर्देशक नवीन पन्तले तयार पार्नेछन्। द्वन्द निर्देशन किरण दाहालको रहनेछ।
फिल्मका बाँकी कलाकार तथा प्राविधिक टोलीको छनोट प्रक्रिया अन्तिम चरणमा पुगेको निर्देशक पन्तले जानकारी दिए। उनका अनुसार अधिकांश कलाकार तथा प्राविधिकसँगको कुराकानी सकारात्मक रूपमा अघि बढिरहेको छ।
पिके इन्टरटेनमेन्टको ब्यानरमा निर्माण हुने ‘बाकस’ ले वैदेशिक रोजगारीसँग जोडिएको सामाजिक विषयवस्तुलाई कथाको केन्द्रमा राख्ने निर्माण पक्षले जनाएको छ। फिल्मको पूर्वतयारी तीव्र रूपमा अघि बढिरहेको छ भने आगामी दशैँलगत्तै छायांकन सुरु गर्ने तयारी गरिएको छ।
