काठमाडौं । अस्ट्रेलियामा निर्माण गरिएको नेपाली साइन्स फिक्सन फिल्म ‘मोक्ष (Mokshya)’को ट्रेलर सार्वजनिक गरिएको छ । ओएसआर डिजिटलमार्फत सार्वजनिक गरिएको ट्रेलरले सामाजिक सञ्जालमा सकारात्मक प्रतिक्रिया पाएको छ ।
सुबर्ण पौडेलको लेखन तथा निर्देशनमा बनेको ५५ मिनेट लामो यो फिल्मले साइन्स फिक्सन र हिन्दू मिथोलोजीलाई संयोजन गर्दै पोस्ट–अपोक्यालिप्टिक शैलीमा कथा प्रस्तुत गरेको छ । फिल्ममा विनाशको संघारमा पुगेको भविष्यको संसार देखाइएको छ, जहाँ अमर पात्र कर्णलाई मानवताको भविष्य निर्धारण गर्ने शक्तिशाली ‘स्यामन्तक मणि’ खोज्ने जिम्मेवारी दिइन्छ ।
कोभिड–१९ पछि छायांकन सुरु गरिएको फिल्म युवा फिल्मकर्मीहरूको समूहले आफ्नै लगानीमा निर्माण गरेका हुन् । कम बजेटमै तयार गरिएको यस फिल्ममा भिजुअल इफेक्ट्स (VFX)लाई विशेष प्राथमिकता दिइएको छ । भिएफएक्स कलाकार आशिम शाक्यले यसमा काम गरेका छन् ।
फिल्ममा सौरव पौडेल, सागर उपमन्यु ढकाल, सञ्जु केसी, राजीव त्वायना, उपेन्द्र अर्याल, पूजन भण्डेल, शिखा उप्रेती र सुवास चन्दको अभिनय रहेको छ । निर्माता गौरव कंडेल हुन् ।
ट्रेलर सार्वजनिक भएसँगै विशेषगरी युवापुस्ताबाट फिल्मको भिजुअल र प्रस्तुति प्रशंसा भइरहेको छ । फरक विधामा बनेको फिल्म भएकाले यसले नेपाली फिल्म क्षेत्रमा नयाँ प्रयोगको संकेत गरेको छ ।
फिल्म ‘मोक्ष’ काठमाडौं अन्तर्राष्ट्रिय पर्वतीय चलचित्र महोत्सव (किम्फ)को २३औँ संस्करणअन्तर्गत मे २७ देखि ३१ सम्म प्रदर्शन गरिनेछ ।
