काठमाडौं । टेलिभिजन श्रृंखला ‘जुठे’को पुनः प्रसारण बुधबारदेखि हुने भएको छ । मंगलबार काठमाडौंमा आयोजित पत्रकार सम्मेलनमा निर्देशकद्वय मरिचमान श्रेष्ठ ‘बल्छी धुर्बे’ र राजु पौडेल ‘राजु मास्टर’ले यसबारे जानकारी दिएका हुन् । बुधबार ‘जुठे’को १२० औं भाग प्रसारण हुनेछ ।
हिमालय टिभीमा बुधबार राति साढे ८ बजे र ओएस आर डिजिटलको युट्युबमा ९ बजे स्ट्रिमिङ हुनेछ । वान–एक्स बेट प्रकरणमा निर्देशकद्वय नै पक्राउ परेपछि सिरियलको प्रसारण रोकिएको थियो । यसअघि मास्टर युट्युब च्यानलमा आउने ‘जुठे’ अब भने ओएस आर डिजिटलमा आउनेछ । ओएस आर डिजिटलले ‘जुठे’ डिजिटल अधिकार खरिद गरेको ओम प्रकाश अग्रवालले बताए। दर्शकहरुले रुचाएको सिरियल अब ओएसआरबाट हेर्न सकिनेछ।
पत्रकार सम्मेलनमा अभिनेत्री विद्या कार्कीको जन्मदिनको केक पनि काटिएको थियो । यो सिरियलमा रवि गिरी, विद्या कार्की, मुकुन्द मैनाली, श्रीप्रसाद थापा, शर्मिला शर्मा, रामबाबु रेग्मी लगायतको पनि अभिनय छ ।
